Pangilin sa Mandaue opisyal gibuksan

CEBU, Philippines -  Gibuksan kagahapong alas-8 sa buntag ang duha ka semana nga mga kalihokan nga gipahaum alang sa tinuig nga pangilin sa dakbayan karong Mayo 8 niining tuiga pinaagi sa usa ka motorkada nga giapilan sa mga opisyal sa kagamhanan sa dakbayan nga gipangulohan ni Mayor Jonas Cortes ug mga barangay opisyal.

Si Louella Cabanero nga maoy vice chairman sa Cultural Historical Sports and Tourism Foundation nga maoy naghan-ay sa mga programa alang sa piyesta ni San Jose nga maoy patron sa dakbayan miingon nga 35 ka mga departamento sa City Hall ang nanguyog.

Matud pa ni Cabanero nga ang 27 ka barangay adunay duha ka mga sakyanan nga miapil sa motorkada nga ilang gipahigayon ug lakip na usab niini ang bus nga maoy giluwanan sa 21 ka mga opisyal nga kandidata sa Miss Mandaue karong tuiga.

Si Mayor Cortes sa iyang pamahayag miingon nga ang tema nga “Mandaue: Our Home, Our Future,” maisip usab nga pagpasalamat ngadto sa Labaw nga Makagagahom sa mga panalangin nga nadawat sa mga Mandauehanon sa matag tuig nga pagpanginabuhi.

Ang motorkada nga nanukad sa city hall misubay sa barangay Looc, barangay Opao, Umapad, Paknaan, Labogon, Basak, Jagobiao, Cubacub, Casili, Tawason, Canduman, Pagsabungan, Tingub, Tabok, Maguikay, Casuntingan. Cabancalan, Banilad, Bakilid, Tipolo, Subangdaku, Mantuyong, Guizo, Ibabao Estancia, Cambaro, City Hospital, barangay Centro, ug gitapos sa Sports Complex.

Ang maong motorkada maoy sinugdanan sa matag adlaw ug gabii nga mga kalihokan nga naglakip na sa Citizens Night-grand baile, Persons with disabilities market vendors day ug daghan pa. (BANAT NEWS)