Pag-ban sa plastic sa dakbayan gituki sa konseho

CEBU, Philippines -  Gipahigayon kagahapon sa Cebu City Hall ang public hearing sa isyu kalabot sa proposal ni Konsehal Edgardo Labella sa pag-ban na sa mga plastic bag nga gitambongan sa mga representante sa nagkadaiyang sektor sama sa mga environmentalist ug mga negosyante.

Sumala pa ni Labella nga importante kaayo nga panggaon ang kalikupan ug usa sa mga pamaagi niini mao ang paglikay sa paggamit og plastic bags ug misugyot nga mas maayong basket nalang ang dad-on sa higayon nga mangompra ang mga tawo sa merkado.

Ang plastic nga dugay kaayong malata nga mokabat pa og katuigan matud pa niya dako og kadaot nga mahatag sa kalikupan ug mao usab ang hinungdan sa mga pagbara sa mga kanal nga miresulta sa paglunop sa baha panahon sa ting-uwan. Naglaraw usab si Labella sa paglikay na sa paggamit og styrofoam nga kasagaran himuon og disposable nga baso ug plato.

Nagkanayon ang konsehal nga mominos ang problema sa basura kung maglikay ang mga tawo sa paggamit og plastic. Natuki sa public hearing kagahapon ang pagsugyot ngadto sa mga negosyante nga mohimo og position paper kalabot sa maong isyu aron ila kining matun-an.

Nasayran nga duna na’y ubang tindahan karon ang nag-anam anam na og gamit og green bag diin mao kini ang kanunay nga gamiton sa ilang mga customers sa higayon nga mopalit kini sa ilang mga baligya. (BANAT NEWS)