Holiday sa Lapulapu City karon

CEBU, Philippines - Pormal nga gideklarar sa Malacanang ang Kadaugan Sa Mactan (KSM) nga usa ka Non- Working holiday sa dakbayan sa Lapulapu karong adlawa.

Base sa Presidential Proclamation no. 132 nga gipirmahan ni Executive Secretary Paquito Ochoa niadtong Abril 24, 2011 kini naglatid nga karong adlawa Abril 27, 2011 usa ka espesyal Non-Working Holiday sa maong dakbayan aron mahandom pag-ayo sa mga Pilipino ang KSM batok sa mga misulong nga langyaw mga Katsila.

Matud pa ni Ochoa nga angayang hatagan og higayon ang mga katawhan sa maong dakbayan sa pagsaulog sa kadaugan ni Datu Lapulapu batok ni Ferdinand Magellan sa Espania kinsa buot moilog sa yuta sa Opon sa milabay’ng 490 na ka tuig.

Gumikan niini walay trabaho ang mga buhatan sa gobyerno ug pribadong kompaniya sa dakbayan sa Lapulapu ug ang mga pribadong patigayon nga mopatrabaho sa ilang mga kawani kinahanglang mohatag og tukmang suhol subay sa balaod sa panahon sa mga adlaw nga piyesta opisyal.

Samtang si Lapulapu City Lone District Congressman Arturo “Boy” Radaza sa iyang bahin naningkamot nga mahimong balaodnon ang permanenteng deklarasyon sa Abril 27 sa matag tuig nga usa ka holiday.

Matud pa ni Lapulapu City Mayor Paz Radaza sa milabay’ng press conference nga giduso na ni Cong. Radaza ang maong balaodnon ngadto sa hawanan sa kongreso nga magdeklarar sa Abril 27 sa matag tuig nga holiday.

Karong adlawa maoy ika 490 nga kasumaran sa KSM diin subling ipasundayag ngadto sa katawhan ang kanhing nahitabo atol sa “Battle of Mactan” kon KSM sa dihang napatay ni Datu Lapulapu si Magellan gumikan sa hugot nga pagsupak ni Lapulapu nga masakop sa Espana ang isla sa Mactan.

Sugdan ang maong kalihukan sa usa ka Santos nga misa sa alas 7:00 sa buntag didto sa Liberty Shrine pinaagi ni Rev. Father Ramon Ofredo.

Sundan kini sa Flag Raising ug Floral Offering uban ni Mayor Paz Radaza ug Vice-Mayor Marcial Ycong ug mga opisyales sa dakbayan sa Lapulapu ug mga sakop sa Philippine Air Force pinaagi ni PAF 2nd Air Division Commander Maj. Gen. Jesus Fajardo ug pinasidunggang dinapit nga si Ms. Rowena Lu Y. Monticillo ang Bag-ong Regional Director sa Departamento sa Turismo sa rehiyon 7.

 Pormal nga sugdan ang pasundayag sa KSM Reenactment alas 9:30 sa buntag uban sa mga artista nga modala sa papel ni Datu Lapulapu, Ferdinand Magellan ug Reyna Bulakna.  - BANAT NEWS