Magsuon nangawat og wire sikop

CEBU, Philippines - Nagtingkagol sa Talisay City detention cell ang duha ka managsuong nadakpan kay nangawat og wire sa poste sa kuryente sa South Road Property (SRP) habig sa barangay San Roque, dakbayan sa Talisay sa miaging gabii.

Ang suspetsadong nasikop sa mga barangay tanod mao si Renato Dayanan Maricap, 20, ug ang manghod niining si Nelcoro Dayanan Maricap, 18, pulos nagpuyo sa White Road, barangay Inayawan, dakbayan sa Sugbo.

Ang mga tanod nga nakasikop sa duha mao sila si Mario Constantino, Mario Gino, ug Protacio Gino.

Naimbargo sa mga tanod gikan sa duha ang duha ug tunga sa metros nga wire sa Visayan Electric Co, (VECO), flier nga gigamit sa pagputol sa wire, gabas ug sako sa semento nga walay sulod.

Base sa imbestigasyon sa mga polis, nasayran nga naaktohan sa mga tanod si Renato nga misaka sa poste sa suga ug miputol sa wire pinaagi sa iyang flier.

Samtang si Nelcoro maoy nagbitbit sa gabas ug sako nga aduna nay sulod nga pinutol nga wire nagbarog sa daplin sa karsada nga nagsilbing lookout.

Kahinumdoman nga sa milabay’ng mga tuig ang mga poste sa SRP napagngan sa suga kay gipangkawat sa mga kiriwan og kamot ang mga wire niini.

Gumikan sa maong hitabo daghang kabalayan sa siyudad ang nawad-an og kahayag lakip na sa linya sa telepono tungod kay gisakiyo sa mga kawatan ang mga wire sa elektrisidad ug kable sa telepono.

Kagahapon ang magsuong Maricap ang gitakdang pasakaan og tukmang kaso sa korte.   - BANAT NEWS