Wanted nga policewoman sa Argao mitahan

CEBU, Philippines - Human sa dul-an upat ka tuig ang nakalabay nga pagtago-tago human gilambigit sa pagpatay sa iyang silingan mitahan ang usa ka policewoman kagahapon sa buntag diha sa Argao Police Station.

Si PO1 Virgilia Albaraccin mituman sa awhag ni Atty. Noel Archival kaniya nga pagtahan samtang ilang lihukon ang motion to dismiss sa maong kaso nga gipasaka batok kaniya ug sa iyang banang si Sammy Albaraccin.

Ang kasong murder gipasaka diha sa provincial prosecutor’s office.

Si Chief Insp. Wilson Parilla, hepe sa Argao Police station nga na-interview sa The Freeman igsuong mantalaan sa Banat News mibutyag nga nga si Albaraccin gitambagan usab sa iyang igsuong pulis nga si SPO3 Esteban Albuera nga motahan.

Si Parilla mibutyag nga base sa gitug-an kaniya ni Albaraccin nga nagbalhin-balhin lang siya og pinuy-anan matag adlaw ug mobisita siya sa iyang pamilya panahon sa kagabhion apan wala gyud siya mobiya sa Sugbu.

“Wala ra man gyud ni siya ingon nilayo kay naa iyang mga anak sa iyang parents,” sumala pa ni Parilla.

Nakadawat og report ang kapulisan sa Argao nga nakit-an sa mga residente si Albaraccin apan dali ra sab kining mibiya sa lugar. Ang kanhi policewoman ug iyang bana maoy gitumbok nga suspetsado sa pagpatay ni Alejandro Caminade niadtong Septiyembre 9, 2007 sa sitio Himongbongan sa barangay Taloot sa maong lungsod.

Si Sammy kinsa una nang mitahan sa Argao police station nalutsan og warrant of arrest ni Judge Maximo Perez lakip na iyang asawa nga nadestino kaniadto diha sa Argao Police station.

Gibalhin si Albaraccin sa Sibonga Police station apan na- dismiss sa serbisyo human sa maong hitabo hinungdan nga nagtago-tago siya dul-an sa usa ka tuig.   - BANAT NEWS