45 anyos nalumos

CEBU, Philippines - Namatay ang usa ka 45 anyos nga lalaki human kini malumos samtang naligo kauban sa mga barkada   didto sa public beach sa barangay Tungkop lungsod sa Minglanilla niadtong Domingo sa alas 4:30 sa hapon.

Ang biktima mao si Fedirico Orbeso, 45, minyo ug molupyo sa dalan Arellano sa barangay San Roque, ning dakbayan sa Sugbo.

Si PO1 Evie Espina, desk officer sa Minglanilla Police Station mibutyag sa Banat News  nga ang biktima kauban sa mga barkada niini ug pamilya nangaligo sa maong   lugar.

Apan samtang nagkalingaw og inom og alak ang iyang mga kauban, ang biktima milakaw nga wa mananghid sa iyang mga kauban ug midiretso kini og tugsaw sa dagat.

Unya nahibulong nalang ang mga kauban niini dihang wala na mahibalik   sa ilang nahimutangan ang biktima, apan dihang mamauli na sila, mao nalay ilang nakita nga naglutaw na sa dagat nga wala nay kinabuhi ang biktima.

Gisakwat dayon kini sa mga kauban ug gihatod dayon ngadto sa Minglanilla District Hospital apan gideklarar kini sa mga doktor nga dead on arrival. - BANAT NEWS