CEBU, Philippines - Gipaniguro sa mga sakop sa City Traffic Management System o CTMS sa dakbayan sa Lapulapu nga dili na maghuot ang trapiko atol sa duha ka adlaw sa Kadaugan sa Mactan “street party” sa maong dakbayan sa umaabot nga Abril 29 hangtod 30.
Ang street party manukad sa Mandaue - Mactan bridge paingon ngadto sa Marcelo Fernan bridge nga magsubay sa ML Quezon Highway sa maong syudad.
Kini maoy gipadayag ni CTMS Director Frank Brazil nga nahinabi sa Banat News.
Matud pa ni Brazil nga dakong leksiyon ngadto kanila ang nahitabo sa gipahigayong "Great Lapulapu Run" diin daghan ang mga pasahero nga mosakay sa eroplano sa tugpahanan sa MCIAA ang nadelatar sa ilang mga flight.
Samtang ang pipila ka mga empleyado sa MEPZA nabalda usab sa ilang mga trabaho gumikan sa pagpasera sa dalan ML Quezon Highway gikan sa unang taytayan hangtod na sa ikaduhang tulay.
Miingon si Brazil nga sa umaabot nga Abril 29 sa hapon ang pikas habig sa dalan ML. Quezon highway himoong “2- way” alang sa mga motorista nga gikan sa dakbayan sa Mandaue nga moagi sa unang taytayan padung ngadto sa MCIA.
Samtang magpabiling bukas ang dalan sa Sangi New road ngadto na sa likod sa city hall nga mogawas ngadto sa airport road alang sa mga gagmay’ng sakyanan.
Gumikan niini nakasiguro ang CTMS nga hapsay na unya ang dagan sa trapiko atol sa Kadaugan Sa Mactan street party.
Si Brazil miawhag usab sa mga motorista ilabi na sa mopadung sa airport nga kinahanglang adto moagi sa 2nd Mactan bridge paingon ngadto sa tugpahanan. - BANAT NEWS