Nalatayan og bus napisat, 2 angol

CEBU, Philippines - Patay diha-diha ang drayber sa motorsiklo nga nalatayan ang lawas ug pulos kritikal ang duha ka angkas niini human madasmagi sa gikasugat nilang bus pasaheroan sa barangay Guinsay siyudad sa Danao niadtong Domingo sa alas 5:45 sa hapon.

Ang namatay mao si Jose Lucero, taga Malbago barangay Luyang lungsod sa Carmen, samtang ang duha niya ka angkas nga pulos nangaangol mao sila si Oliver Cando, ug Bethoven Oncines. Samtang ang drayber sa Ceres bus nga dunay plaka nga GXF-315 mao si Julito Abayon kinsa mitahan usab sa kapolisan.

Matud ni PO1 Rommel Costan, traffic investigator sa Danao City Police dihang nahinabi sa Banat News kusog nga nagpadagan gikan sa siyudad sa Sugbo paingon sa Bantayan ang bus.

Samtang ang mga biktima gikan sa lungsod sa Carmen paingon sa siyudad sa Danao ug nagsugat ang direksiyon apan pag-abot sa maong dapit giingong mi-overtake ang motorsiklo sa nag-unang motorsiklo apan nasampak kini sa maong bus.

Matud pa sa drayber sa bus nga misuway unta kini paglihay sa motorsiklo apan nasangit gyud ang manobela niini ug nalamba hinungdan sa pagkalagpot ni Lucero ilawom sa maong bus ug nalatayan sa ligid ang lawas.

Samtang ang duha ka angkas ni Lucero daling gidala sa Danao District Hospital.   - BANAT NEWS