Karne sa 13 ka meat vendor hugaw

CEBU, Philippines - Gitakdang padad-an na og ‘Notice of Violation’ ang 13 ka mga tindera og karne kansang baligya nga ilang giladlad sa nagkadaiyang merkado sa dakbayan sa Sugbo namatud-ang positibo sa Salmonella bacteria, sumala sa Philippine Information Agency (PIA)7.

Gikutlo sa maong ahensya ang pamahayag ni Cebu City Market Administrator, Raquel Arce kinsa miingon nga ang 13 ka mga vendor sa karne nasakmitan og mga sample sa karneng ilang giladlad sa ilang mga lamesa.

Bisan wala hinganli ni Arce ang mga hingtungdan apan giklaro niya nga 8 sa 13 anaa sa Unit 1 Carbon Public Market, I sa Pardo Public Market , samtang ang 4 anaa sa Taboan Public Market.

 Sumala pa ni Arce, nga ilang susihon ang record niining   13 ka mga meat vendor kung kapila na sila makahimo sa maong kalapasan.

 Kini aron matino kun unsang klase nga multa ang ipahamtang sa maong mga malapason.

 Base sa Market Code, ang una ug ikaduhang higayon nga paglapas, ipaseminar lang una ang malapason bahin sa mga balaod nga may labot sa pagpamaligya og makaon unya pabayron og balig tulo ka buwan nga abang sa ilang lamesa o stall.

Sa ikaduhang paglapas, kantidad sa lima ka buwan nga abangan maoy ipabayad sa malapason, ug sa ikatulo hinglan na sila sa puwesto, matud pa ni Arce. Ang salmonella naggikan mismo sa hayop nga giihaw o kaha sa hugaw nga palibot sa dapit diin kini iladlad ug peligro kaayo nga motakud sa lawas sa tawo nga makakaon niini.

Midugang si Arce nga ipatawag na nila karong semanaha ang 13 ka mga meat vendor aron patambongon sa meting nga pangulohan ni City Administrator Jose Marie Poblete. (PIA-7/HFG/WC)(BANAT NEWS)