Suspetsadong pusher og shabu tiklo

CEBU, Philippines - Nadakpan sa kapolisan ang usa ka gikatahapang pusher og shabu sa sitio Kapasanan sa barangay Casili, dakbayan sa Mandaue atol sa checkpoint nga ilang gihimo sa miaging gabii.

Ang nadakpan mao si Edgar Castro, 44, nga taga Upper Casili, dakbayan sa Mandaue kinsa nasakmitan og duha ka pakete nga gituohang shabu. Si Inspector Zosimo Jabas Jr. ug mga kauban sa Presinto 6 sa Canduman Police Station maoy nangulo sa pagdakop sa suspetsado.

Matud pa ni Inspector Jabas nga ilang gipahunong ang motorsiklo nga giluwanan sa suspetsado ug   kini gipakanaug aron rekisahon ug didto nadiskobrehan nga nagdala kini og duha ka pakete nga gituohang shabu.

Human sa maong pagrekisa gidala dayon sa kapolisan ang suspetsado ngadto sa ilang buhatan uban sa motorsiklo, niini.

Ang suspetsado gibalhog dayon   sa bilanggoan ang gikatakdang pasakaan og kaso sa kapolisan sa Mandaue City Police Office (MCP0) karong adlawa Lunes. (BANAT NEWS)