2 ka tig-deliver og softdrinks gipanulis

CEBU, Philippines - Duha ka mga drayber sa delivery truck sa softdrink nabiktima sa mga tulisan sa managlahing oras ug dapit niadtong Sabado Santo sa dakbayan sa Mandaue.

Si SP02 Danilo Ibarrita sa Presinto 3 sa Basak Police Station miila sa unang biktima sa pagpanulis nga mao si Dante Laguna, 26, minyo, nga taga barangay Maslog sa dakbayan sa Danao ug truck driver sa Rule Marketing sa barangay Tabok sa maong dakbayan.

Nasayran nga ang biktima naghatod og softdrink sa usa ka tindahan sa Upper Tabok sa maong dakbayan ug kauban niini si Jundie Librero, hingkod, nga maoy helper niya.

Dugang pa ni SP02 Ibarrita nga dihang paingon na ang duha sa ilang sakyanan kalit lang mitumaw ang duha ka wala hiilhing armadong mga lalaki nga nagsakay og motorsiklo, nagsul-ob og itom nga jacket nga 5’5” ang gitas-on sa pamarog ug nagsul-ob og close type nga helmet.

Gitionan dayon sila sa armas nga kalibre 45 ug kalibre 38 ug gipangayo ang belt bag nga gibakus sa hawak ni Laguna nga maoy gisudlan sa ilang kinolektang salapi nga nagkantidad og P49,000 ug human makuha dali usab nga mipabulhot og padagan ang mga tulisan sa ilang giluwanang motorsiklo pahilayo sa maong dapit.

Ang ikaduhang biktima mao si Danilo Cuesta, 40, minyo, nga taga barangay Cogon, lungsod sa Liloan ug driver sa AFL Trading Corporation   nga nagbase sa dalan Hernan Cortes sa barangay Banilad, dakbayan sa Mandaue ug Albert Balucan, 27 anyos, ulitawo nga truck boy niini.

Matud pa sa mga biktima   nga naghatod sila og softdrink sa usa ka tindahan sa Galaxy Compound sa barangay Maguikay sa maong dakbayan alas 2:00 pasado ang takna sa hapon sa mao gihapong adlaw dihang kalit lang usab mitumaw sa ilang luyo ang duha ka wala hiilhing tawo nga nagsakay og XRM nga motorsiklo nga walay plate number. Gitionan dayon sila og armas nga wala nila matino ang kalibre ug mideklalar nga tulis dayon gipangayo ang ilang nakolektang salapi nga nagkantidad og P6,000, dayong sibat pahilayo sa maong lugar.

Ang duha nagsul-ob usab og itom nga jacket ug close type nga helmet ug 5’5” usab ang ilang pamarog nga nakapaturok sa pagtuo nila ni SP02 Ibarrita nga ang tulisan nga nanulis sa barangay Tabok mao usab ang mga tulisan nga nanulis sa barangay Maguikay sa maong dakbayan.

Sa pagkakaron padayon pang gipangita sa kapolisan ang maong mga tulisan. (WC)(BANAT NEWS)