Kabanhawan festival gidugok sa tawo

CEBU, Philippines - Sama sa mga milabay’ng tuig ang Sugat Kabanhawan Festival sa lungsod sa Minglanilla gihugpaan sa kaliboan ka mga tumatan-aw.

Ang Sugat gipahigayon sa dakung oval sa Minglanilla Central School sa barangay Ward I, Poblacion.

Kagahapon mga alas 2:00 sa kadlawon gipahigayon ang misa alang sa Sugat ug sa pagka-alas 3:30 sa kaadlawon gipahigayon ang re-enacment sa Sugat ug nahuman mga alas 4:30 na sa kadlawon.

Sama sa naandan gisaysay ang pagpasakit ug paglansang ni Hesu Kristo ug human sa maong pagsaysay adunay panag-away tali sa itom nga Agila nga simbolo sa kangit-ngit ug San Miguel Arkanghel nga pangulo sa mga Quiruben.

Sa pagkapildi sa kangit-ngit migawas dayon ang imahen ni Birhen Maria ug sa iyang anak nga si Hesus kinsa gikang nabanhaw sakay sa karo ug gitagbo sila taliwala sa oval.

Nabantayan nga daghan ang mga bata karon isip mga Anghel apan didto lang sila sa stage gipabarog samtang ang uban didto sa ubos.

Itandi sa milabay’ng tuig ubay-ubay ang mga batang Anghel ang gipamitay, apan karon lima lang.

Matud pa ni Victor Cuenco, artistic director sa maong kalihukan nga gituyo karon nga gamay lang ang mga gibitay nga Anghel aron dili madugay ang presentasyon.

Sa samang higayon karong tuiga   200 ka mga bata ang gihimong mga Anghel itandi sa milabay’ng tuig nga wala makaabot og 100 ka bata.

Ang maong mga batang Anghel taga lungsod sa Minglanilla ug ang mga nanayaw sa finale nga pasundayag mao ang mga dance troupe sa nagkalaing-laing tunghaan sa lungsod.

Sama sa milabay’ng tuig ang karo nga gisakyan sa mga imahen maoy gidumog sa mga tawo aron manguha og mga buwak kay daghang mituo nga ang maong mga buwak nga ibutang sa karo makatambal og mga sakit pinaagi sa paghumol niini sa lana ug sa higayong ihaplas na ang lana sa lawas sa masakiton ilabi na kun imnon ang maong lana dili na kinahanglang moadto pa og doctor ang masakiton kay milagrohan kini sa lana og masalbar gyud ang masakiton, nga dila na mogatos og linibo ka pesos sa doctor.

Ang mga imahen higpit nga gibantayan tungod kay dunay uban nga gustong moputol sa kapa ug belo sa Birhen tungod sa pagtuo nga swerte kini sa panagat ug ang uban usab nagtuong swerte kini sa pagpanabong og manok.

Ang kapa basta ikarga kuno sa sakayan sa mananagat mura lang og magneton ang mga isda ug usahay mura lang kuno og motuyo paglupad ang mga sida nganha sa luwang sa sakayan sa mananagat.

Kun itaod ang kapa ipasukip usab hapin buwang sa tiil sa itari nga manok, taas kaayo og lupad ang manok ug inigtugpa niini badlisan dayon sa iyang buwang ang kontra.

Matud pa sa mga meriko nga ang problema lang kung pulos may kapa ang duha ka manok nga magtari, dili magdaog busa tabla.

Sa laing bahin, si Chief Inspector Laurel Almerante, hepe sa Minglanilla Police Station mibana-bana nga mikapin sa 10,000 ka tawo ang mitan-aw sa Sugat diin 80 porsyento niini mga batan-on.

Makita kagahapon sa palibot sa lungsod ug sa lugar diin gipahigayon ang Sugat nga dunay mga batan-on ang nag-inom ug naggrupo-grupo.

Ilang gipakita nga malipayon sila sa maong higayon tungod kay sugat sa pagkabanhaw ni Hesu Kristo.

Apan matud sa hepe nga walay mga kagubot nga nahitabo gawas lang sa tulo ka pagpanguot og cellphone ug pitaka.

Ang mga misulod sa Central School gikapkapan sa kapolisan ug hinuon walay mga nabawian og mga armas bisan kutsilyo.

Ang grupo sa Special Reaction Unit (SRU), K-9 sa Philippine Drug Enforcement Agency ug mga kapolisan gikan sa nagkalain-laing dakbayan ug kalungsoran ang temporaryong gidestino sa Minglanilla atol sa kasaulogan sa Sugat.

Si Sherlock Casas, 25, nga taga dalan Tres de Abril, barangay Duljo Fatima, dakbayan sa Sugbo usa ka manindahay og tubig nagkanayon nga itandi sa milabay’ng tuig gamay lang ang tawo karon nga mitan-aw sa Sugat ug gani gamay lang ang iyang halin karon sa iyang mga baligyang tubig.

Ang mga nabiktima sa pagpanguot mao si Deok Hamlett, 34, usa ka American-Korean national nga nagpuyo sa Candulawan, Minglanilla.

Ang insidente nahitabo samtang naglakaw si Hamlett uban sa iyang higala sa barangay Tulay sa mga alas 11:00 niadtong Sabado sa gabii diin nakuha sa kawatan ang pitaka sa maong biktima nga dunay sulod nga P4,500 nga kwarta. Ang sunod nga biktima mao si Robert Allonar, 15, taga Lawaan III, dakbayan sa Talisay. (BANAT NEWS)