Nanghinol og babaye gipriso

CEBU, Philippines - Nakaangkon og mga bun-og sa lawas ug nagtingkagol sa Talisay City detention cell human makulatahi sa mga estambay ang usa ka giingong hubog nga nanghinol sa pribadong lawas sa usa ka babaye dayon iyang gisukmag tungod kay misuki ang biktima didto sa barangay Tabunok, dakbayan sa Talisay sa miaging Sabado sa gabii.

Ang suspetsado mao si Eually Cañada, 32, ulitawo, nga taga barangay Inayawan, dakbayan sa Sugbo, samtang ang biktima usa ka babayeng 30-anyos, nga taga dakbayan sa Talisay. Si Eually nga nahinabi ni SPO1 Ricardo Balbutin duty jailer sa detention cell nangangkon nga uyab niya ang biktima ug nag-inom kuno sila   niadtong higayona.

Nasayran sa kapolisan nga si Eually giingong hubog kaayo ug dihang giganahan nagsil-ing sa lawas sa babaye, milihok kuno ang mga kamot niini ug didto paingon sa pribadong bahin sa lawas sa biktima.

Ang biktima nga wala makauyon, mikulisiw ug puwerting sukoa, apan inay mangayo og pasaylo, ang suspetsado nasuko usab ug gisumbag ang maong babaye.

Ang mga estambay nga nakakita sa gibuhat ni Eually miduol ug gitabangan siya og kulata.

Ang grupo sa Special Reaction Unit (SRU) nga gipangulohan ni SPO1 Ariel Espinedo naatol usab nga miagi sa lugar nga nahitaboan busa mihunong kini dihang nakita nila ang kagubot.

Usa sa mga nagpakabana nga tawo sa Tabunok mao nay misignit kang Eually ug mitugyan ngadto sa SRU.

Ang SRU mao usab ang midala kang Eually ngadto sa Talisay City Police Station diha sa barangay Poblacion diin didto siya magpahayahay sulod sa prisohan. (WC)(BANAT NEWS)