CEBU, Philippines - Gidakop sa mga polis ang usa ka 42-anyos nga amahan nga gireklamo sa 20-anyos nga anak niining babaye nga mihimo kaniyang ‘sex slave’ sulod sa napulo ka tuig sukad pa sa iyang pagkabata.
Ang pagkamananap sa amahan ngadto sa iyang anak miresulta sa pagbunga niini duha ka higayon. Ang biktima (pangalan gitago sa Banat News) aduna karoy usa ka 6-anyos nga anak nga babaye ug ang ikaduha 4- anyos nga lalaki nga giingong bunga sa gibuhat kaniya sa iyang amahan.
Ang biktima subli na usab untang lugoson sa iyang amahan niadtong Abril 19 apan nakaikyas siya ug misumbong na sa kapolisan hinungdan sa pagkasikop sa suspetsado.
Ang suspek gibalhog na sa detention cell sa Presinto 5 sa Opao Police Station sa dakbayan sa Mandaue human dakpa sa grupo ni Inspector Wilson Abot, hepe sa Presinto 5 sa garahian sa gitrabahoan niining taksi.
Matud pa sa biktima ngadto nila ni Abot, nagsugod pagpanglugos kaniya ang amahan niadtong nag-edad pa siya og 10-anyos dihang gibiyaan sila sa ilang inahan.
Unang nagbunga ang pagkagutom sa unod sa suspek dihang nag-edad na siya og 14. Apan wala gihapon matagbaw ang suspek ug padayon gihapon niya kining gihimo hangtud nga namabdos na usab siya sa pag-edad niya og 16.
Niadtong Abril 19 sa hapon miuli ang iyang amahan gikan namasahero og taksi ug misuway na usab unta og lugos kaniya apan niining higayona napuno na ang biktima ug miikyas dayon misumbong sa kapolisan.
Mitug-an ang biktima nga sukad kaniadto pa wala na siya makapangisog aron isumbong ang gihimo sa iyang amahan kaniya tungod sa kanunay niining pagpanghulgang siya patyon. (EIM) (BANAT NEWS)