City jail kuwang og jail guard

CEBU, Philippines - Mihangyo si Cebu City Jail Warden Supt. Maria Victoria Jimenez og dugang tawo sa Cebu City jail nga nahimutang sa Barangay Kalunasan. Kini tungod kay matud pa ni Jimenez adunay 142 lang ka mga warden ang nadestino sa maong prisohan busa kuwang kaayo kini ilabi na karong may 2,000 na kapin ang nagpunsisok nga mga pinirirso sa Cebu City Jail.

Sa maong gidaghanon, kinahanglan usab og 200 ka mga warden busa kuwangan sila karon og 58 ka tawo.

Gipasalig hinuon ni Jimenez nga bisan sa kakuwang sa ilang mga tawo, pabiling lig-on ang pagbantay nila sa seguridad sulod sa prisohan.

“Trabaho nato ang pagbantay sa prisohan, busa amo gyud nga gipaneguro nga naa sa maayong kamot ang piniriso,” suma pa ni Jimenez.

Gipaneguro usab ni Jimenez nga mopatigbabaw ang maayong sistema sa pagpadagan sa Cebu City Jail.

Ipadayon usab ni Jimenez ang maayong programa nga nasugdan na ni kanhi warden Supt. Felixberto Jagorin sama sa mga gipatumang livelihood program alang sa mga piniriso.

Dugang pa niya nga modangop siya kang Mayor Michael Rama aron kahatagan og food assistance ang mga piniriso. Sa pagka-karon, bugtong gisaligan sa City Jail ang P50 nga kantidad sa pagkaon matag piniriso budget sa matag adlaw.  (BANAT NEWS)