Miuwang sa away, giluba kritikal

CEBU, Philippines - Kritikal ang kondisyon sa usa ka babaye human kini dunggaba sa iyang silingang may gikalalis didto sa Sitio Kalubihan, Brgy. Pajac dakbayan sa Lapulapu sa milabay’ng Huwebes Santo sa gabii.

Ang biktima mao si Emilia Saylanon, 45, minyo, walay trabaho ug residente sa maong dapit.

Samtang ang suspetsado mao si Teofilo Badayos, hingkod, ug silingan sa biktima.

Base sa imbestigasyon ni SPO1 Manolito Abellanosa sa Crime Against Persons desk, sa Lapulapu City Police Station nasuta nga misung si Badayos sa balay ni Saylanon ug nangita kang Redentor Navarro ang Chief Tanod sa Brgy. Pajac.

Dihang nagkita sila si Navarro, mitumaw ang ilang mainitong lalis unya kalit nga misal-ot si Saylanon aron uwangon ang duha , apan sa kasuko ni Badayos ang biktima maoy gitusak sa iyang kutsilyo hinungdan nga nasamdan ang nagkalainlaing bahin sa lawas niini. Gihatod dayon sa tambalanan sa dakbayan sa Lapulapu ang biktima ubos sa kritikal nga kondisyon.

Samtang si Badayos dali nga nakasibat ug mao karon ang gipangita sa kapolisan.

Si SPO1 Abellanosa miingon nga angay likayan ang away sa duha ka tawo ilabi na kun anaa na kini sa hilabihang kainit. (WC) (BANAT NEWS)