Konsehal gikawata'g armas de fuego

CEBU, Philippines - Si Konsehal Val Ylanan sa dakbayan sa Talisay gibati og kabalaka tungod sa pagkawagtang sa iyang 9mm nga pistola hinungdan nga dali siyang mi-report ngadto sa Talisay City Police Station sa milabay’ng adlaw.

Si Ylanan nagkanayon nga ang maong pistola lisensiyado ug peligro kun   gamiton kini sa binuang sa nagkuha.

Ang suspetsado mao si Arnel Labitad, 37, residente sa maong barangay ug kanhi iyang janitor   sulod sa kapin duha ka tuig.

Si Ylanan mipasangil nga matag-limpiyo ni Labitad sa iyang opisina namatikdan niyang adunay mangawagtang nga kwarta hinungdan nga niadtong Abril 11, 2011 gidid-an na niya kining makasulod sa iyang opisina apan gidestino niya kini ngadto sa laing trabaho.

Niadtong Abril 14, 2011 si Ylanan milarga paingon sa Manila ug nabalik sa Sugbo niadtong Abril 16, 2011 ug sa paghiling niya sa iyang hunos, wala na ang iyang armas de fuego.

Unya sa iyang pagsukit-sukit sa uban niyang mga sakop sa opisina iyang nahibaw-an nga si Labitad misulod sa iyang opisina bisan wala na niya kini tugoti.

Si Ylanan nagkanayon nga iyang gihangyo si Labitad nga iuli ang iyang armas ug giingong igo lang kining moduko ug dili motingog.

Matud usab sa Konsehal nga mohangyo siya sa kapolisan nga ipaimbestigar ang pagkawagtang sa iyang armas.

Sa laing bahin, gawas sa maong insidente si Ylanan mi-report usab nga niadtong Marso 29, 2011 sa buntag maayong pagkabangag sa walang bahin nga pultahan sa iyang Kia Rio dihang mibuto ang iyang 9mm nga pistola samtang gikargahan kini og bala sa iyang personal driver nga si Leofe Padigos, hingkod ang panuigon.

Apan nahanaw lang kini daw aso sa iyang pagduaw ngadto sa kaulohan, matud pa ni Ylanan. (BANAT NEWS)