VG Sanchez gibisita ni Vidal

CEBU, Philippines - Gibisita kagahapon ni kanhi Arsobispo Ricardo Cardinal Vidal ang masakiton nga si Bise Gob. Gregorio Sanchez, Jr. sa tambalanan sa dakbayan sa Sugbo diin siya nagpatambal sa kanser sa baga.

Si Vidal giingong nakighinabi lang sa mga anak ni Sanchez nga sila si Grecilda “Gigi” Zaballero ug Gerlyda “Gerly” Spiller.

Matud pa ni Kapitan Yody Sanchez sa Busay, dakbayan sa Sugbo nga gitambagan ni Vidal ang managsuon nga iyaha usab nga ig-agaw nga mosalig lang sa Ginoo sa kaayuhan sa ilang amahan.

Si Vidal mipadayag sa iyang kalipay sa gihimo ni Sanchez sa lagsik pa kini pinaagi sa iyang tulumanon sa radio nga nakakuha og pasidungog sa Cebu Archdiocesan Mass Media Awards (CAMMA) for “Best Developmental Radio Commentaries.”

Ang programa gilangkuban sa “Bulawanong Binhi”, “Ang Magpupugas” ug “Kalambuan” nga nagsilbing gabayan sa mga tigpaminawan sa pag-usab sa ilang kinabuhi. Atol sa niaging Siete Palabras, si Sanchez nakapalanog pa sa ikatulong pulong sa Dios nga nagkanayun, “Babaye ania ang imong anak, anak nia ang imong inahan.”

Tipik sa pagpamulong, si Sanchez nagkanayon, “bisan ako naglawig sa kangitngit ug walog sa kamatayon, dili ako mahadlok kay anaa ang Labaw’ng Makagagahom.” Ang pamilya ni Sanchez nanawagan karon sa ilang kahigalaan sa pag-ampo. (BANAT NEWS)