Manimbahay magbaha sa Visita Iglesia

CEBU, Philippines - Modagsa karon ang mga Katolikong manimbahay sa nagkadaiyang simbahan alang sa tinuig nga tradisyon sa Visita Iglesia karong adlaw sa Huwebes Santo.

Karong adlawa usab ipahigayon ang Santos nga Misa sa paghandom sa katapusang panihapon ni Hesu Kristo uban sa mga Apostoles sa wala pa siya ilansang sa krus.

Matud pa ni Archdiocese of Cebu Episcopal Vicar Msgr. Esteban Binghay nga ang “Altar Repose” himoon usab karong adlawa diin ang lawas ni Kristo igawas gikan sa tabernakolo.

Ang eucharistiya dad-on sa usa ka prosesyon ug ibalhin og lugar sa dili pa kini bahin-bahinon atol sa pagpangalawat sa Misa sa Biyernes Santo.

Ugma ipahigayon usab ang tinuig nga Siete Palabras o ang katapusang pito ka pulong ni Hesu Kristo atubangan sa Cebu Metropolitan Cathedral sugod sa alas 12:00 sa udto, diin lakip sa mga mamumulong mao sila si Archbishop Emeritus Ricardo Cardinal Vidal ug Arsobispo Jose Palma.   - BANAT NEWS