CEBU, Philippines - Usa ka suspetsadong tulisan kinsa nakigpinusilay sa mga polis nasikop didto sa barangay Lawaan, dakbayan sa Talisay kagahapon sa alas 3:20 sa kaadlawon.
Ang nasikop mao si Jovert Nabello, 25, taga barangay Cansojong sa maong siyudad kinsa nakaangkon og samad pinusilan sa walang paa human kini mapusili ni SPO3 Daniel Tarucan.
Base sa report nga si Nabello uban ni Marlo Caparida, hingkod, taga barangay Mohon, Talisay nag-angkas sa usa ka motorsiklo gikan sa barangay Tabunok paingon ngadto sa habagatan.
Apan sa pag-abot nila sa Lawaan nasabod sila sa usa ka checkpoint sa kapolisan nga gipangunahan ni Senior Inspector Errol Francis Deveyra sa Talisay City Police Station.
Apan dihang kapkapan na unta sila, mipasutoy sila og padagan sa ilang motorsiklo hinungdan nga gigukod sila sa kapolisan.
Unya si Nabello milanit sa iyang armas de fuego ug gipabuthan ang mga polis nga migukod kanila, hinungdan nga mibawos si Tarucan pagpabuto ug maayong pagkaigo sa walang paa ni Nabello apan si Caparida nakaikyas nga walay samad.
Nasakmit sa kapolisan ang .357 nga revolver ni Nabello uban sa tulo ka buhing bala niini ug usa ka kabhang, usa ka linikit nga marijuana ug usa ka bag nga adunay sulod nga mga butang sa babaye.
Si Azarcon nagkanayon nga si Nabello bag-o lang nakagawas gikan sa Talisay City Jail tungod sa kasong illegal possession of firearms.
Si Nabello anaa karon sa Vicente Sotto Memorial Medical Center samtang si Caparida ug ang drayber sa motor padayon pang gipangita sa mga polis. - BANAT NEWS