Piniriso sa CCJ mikalma

CEBU, Philippines - Gipahibalo ni Cebu City Jail Warden Supt. Maria Victoria Jimenez nga mikalma na karon ang kapin sa 2,000 ka piniriso sa Cebu City jail nga nahimutang sa Barangay Kalunasan.

Kahinumdoman nga puwerting sabaa sa mga piniriso sa dihang pormal nga maoy gihulip si Jimenez kang Supt. Felixberto Jagorin ang kanhi warden sa prisohan sa dakbayan.

Nagsaba-saba ang maong mga piniriso gumikan kay dili sila gusto pahulipan si Jagorin.

Apan giklaro hinuon ni Jimenez nga iya nang gipasabot ang mga piniriso busa mikalma kini.

 “Wala man sila masuko nako, nawili lang gyud sila ni Sir Jagorin,” matud pa ni Jimenez.

Giangkon ni Jimenez nga wala siya mahadlok sa dihang nagsaba-saba ang mga piniriso sanglit nakasabot siya sa sitwasyon.

“Wala man ta’y kahadlokan, tarungon lang nato sila sa pagdala. Nakasabot raman sad ta kung nganong ingon-ato ang ilang reaksyon. Basta karon, okay na gyud kaayo,” dugang pa ni Jimenez.

Si Jimenez milingkod pagka- City jail warden niadtong Abril 16 isip hulip ni Jagorin nga pinasubay usab sa hangyo ni Mayor Michael Rama kinsa nawad-an og pagsalig kang Jagorin.

Usa sa hinungdan nga gipailisan sa mayor si Jagorin mao ang pagbutyag niini nga dili niini kaya ang pagbantay sa seguridad ni Adonis Dumpit sulod sa bilanggoan.

Gipasalig ni Jimenez nga luwas si Dumpit sulod sa prisohan busa dili angay mabalaka ang mga kabanay sa maong piniriso. (BANAT NEWS)