Mambaling flyover abli na
CEBU, Philippines - Gipaniguro sa kagamhanan sa siyudad sa Sugbo nga maminosan na ang problema sa trapiko sa Mambaling gumikan sa pagbukas karong adlawa sa bag-ong flyover sa maong dapit.
Sumala pa ni Mayor Michael Rama nga dako kaayo og tabang ang flyover gumikan kay kanunay gyud maghuot ang trapiko ilabi na sa N.Bacalso Avenue panahon sa rush hour.
Gihan-ay na usab sa siyudad ang mga traffic signs sa maong flyover sa tuyo nga kalikayan ang mga aksidente sa kadalanan.
Samtang nanawagan sa publiko ang Cebu City Traffic Operations Management (CITOM) nga motuman sa mga balaod sa trapiko aron hingpit nga matulin ang dagan sa mga sakyanan.
Sumala pa sa base control operator sa CITOM nga si Sidney Racaza nga alerto karon ang puwersa sa traffic enforcers sa Mambaling flyover aron mabadlong ang drayber nga kusog magpaugat sa kadalanan.
“Sa una, kasagaran sa problema nga masugatan nianang lugara kay kana gyu’ng mga paugat nga sakyanan. Mga PUJ nga kusog mohunong bisan No Stopping Area. Kanang sitwasyona, makasamot na sa problema sa trapiko,” matud pa ni Racaza sa dihang nahinabbi sa Banat News kagahapon.
Samtang padayon karon nga gitun-an sa CITOM ang volume sa mga sakyanan nga mangagi sa maong area pagtino kung epektibo ba ang maong flyover. (BANAT NEWS)
- Latest
- Trending
