Construction worker gidunggab kritikal

CEBU, Philippines - Kritikal ang kahimtang sa usa ka construction worker nga gidunggab sa usa sa iyang mga bisita atol sa fiesta didto sa sitio Bakak, barangay Bogo sa lungsod sa Argao niadtong Domingo sa gabii.

Ang biktima nga nakaangkon og samad dinunggaban sa dughan mao si Restituto Ypon Allarce, 38 , minyo ug construction worker nga nagpuyo sa maong lugar, samtang ang suspek mao si Elmer Saluna, hingkod ang panuigon ug buwag na sa iyang asawa.

Si PO2 Benjamin Gerozaga sa Argao Police Station mibutyag sa Banat News nga ang anak sa biktima nga si Joy Lobitos Allarce mitug-an kanila nga didto siya sa ilang kwarto dihang ang biktima ug ang suspek uban sa mga higala nila nag-inom sa gawas.

Apan dihang nangalasbag na, nagkalalis ang duha nga misangpot sa ilang paglinayogay, apan giuwang sa ilang mga kauban.

Apan dihang gisusi niya ang iyang amahan, samdan kini sa dughan samtang ang suspek nakasibat dayon.     

Ang biktima gihatod dayun ngadto sa Argao District Hospital apan gibalhin kini sa tambalanan sa dakbayan sa Sugbo gumikan sa katalandugon sa kahimtang niini.

Ang kapolisan padayon pang nagpangita karon sa suspetsado. (Darrel A. Carumba/WC) 

Singaporean gilabnihan sa mahalong bag

Nasakiyo sa   duha ka mga snatcher ang mahalong bag ug mga butang sulod niini sa usa ka Singaporean nga dalaga didto sa sitio Matumbo, barangay Pusok, dakbayan sa Lapulapu sa miaging gabii.

Ang biktima nga nagtibi nga misumbong sa kapolisan sa nahitabo kaniya nailhan nga si Jovan Ruan, 28, dalaga, financial consultant sa Singapore ug kasamtangang nagpuyo sa Kenner Hills Condominium sa dakbayan sa Lapulapu.

Sumala ni SPO2 Frederick Eslit sa Lapulapu City Police Station nga ang biktima naglakaw sa karsada samtang nangita og kan-anan   dili layo sa gisak-an niyang condo, dihang kalit lang mihunong sa kilid sa biktima ang usa ka motorsiklo nga gisakyan sa duha ka wala hiilhing mga lalaki.

Unya kalit nga gilabni sa nag-angkas ang bag sa biktima dayong padagan sa ilang motorsiklo .

Ang bag nga Louis Vuitton nagkantidad og $550; cell phone ,$700, camera, $300 ug cash nga $18 mil nga nasakiyo sa snatcher.

Sa pagkakaron gipangita pa sa kapolisan ang mga tulisan. (BANATNEWS)