2 ka Koreano nalumos

CEBU, Philippines -  Patay ang duha ka batan-ong Korean national nga gituohang nalumos samtang nag-island hopping sa kadagatan sa Barrio Proper isla sa Hilantagaan sa lungsod sa Sta. Fe sa isla sa Bantayan kagahapon sa alas 12:51 sa udto.

Ang mga biktima nailhan pinaagi sa ilang mga passports ug gituohang magtiayon mao sila si Myung Kyu Jang, 28, ug asawa niining si Hyejung Jang, 31.

Samtang ang mga mananagat nga nakakaplag sa mga biktima mao sila si Donato Martus ug Arturo Jumola nga kanhi kapitan sa barangay nga maoy gipangayoan og tabang sa boat operator nga si Uriel Mahipos sumala pa sa imbestigador nga si PO2 Eric Ilustrisimo.

Si Hilantagaan barangay councilor Roger “Titing” Segovia dihang nahinabi sa Banat News mibutyag nga ang mga biktima napalgan nga pulos wala nay panimuot.

Gihulagway ni Segovia nga naghayang ang babaye samtang nagkulob ang lalaki nga nagtupad ilawom sa dagat ug wala nay mga panimuot dihang nadiskubrehan nila Martus ug Jumola.

Tungod kay wala na maglihok nagtuo ang duha nga nangalumos kini ug dali nilang gipangkuha gikan sa ilawom.

Tungod sa kalisod paghaw-as kanila gikan sa dagat padulong sa ilang sakayan ilaha nalang kining gipanghiktan sa mga buhok ug giguyod sila paingon sa baybayon ug gipahibalo ang kapolisan.

Dugang nahipos nga impormasyon ni Segovia, ang duha giingong mibisita sa maong lugar ug nag-island hopping nianang pagkasayo sa buntag kauban ang operator sa gipakyaw nilang pumpboat.

Ang hepe sa Sta. Fe nga si Insp. Jaime Tolentino maoy nangulo sa miresponde nga mga polis ug midala sa mga patay’ng lawas sa Bantayan District Hospital aron ipasusi kun wala bay foul play sa ilang kamatayon.

Si Ilustrisimo mitug-an nga base sa ilang nakuhang impormasyon si Mahipos nagluto pa og paniudto sa duha ug gipasagdan lang niya silang naglakaw-lakaw sa baybayon.

Human niya maluto ang pagkaon wala na niya sila makit-i. Tungod kay mitaob naman nabalaka na siya sa duha hinungdan nga nagpatabang siya sa mga mananagat. Gidudahang naglangoy-langoy ang duha sa dagat ug dili makamaong molangoy maong nangalumos.

Matud pa usab sa maong konsehal (Segovia) nga sa panahon sa tingbakasyon sagad sa mga mananagat mo-shift sa ilang panginabuhian gikan sa panagat ngadto na sa pagpaabang sa ilang mga pumpboats sa mga turistang mobakasyon diha sa maong lugar.(EIM) (BANATNEWS)