Natulog gisaka sa balay gipusil

CEBU, Philippines - Kritikal ang kondisyon sa usa ka lalaki human kini pusila sulod sa iyang balay didto sa Sitio Kasanta, Brgy. Mactan dakbayan sa Lapulapu kagahapon sa buntag.

Ang biktima mao si Miguel Otagan Maravilla, 30, minyo, ug residente sa maong dapit.

Samtang duha ka mga tawo ang gitumbok nga maoy responsable sa maong pagpamusil nga nailhan lang sa ngalang   Jimrex ug Manila Boy pulos hingkod apan walay klarong address.

Si PO2 Carlos Barluado ug PO1 Franklin Bulaquia sa Lapulapu City Police Station mibutyag sa Banat News nga kagahapon sa buntag ang biktima natulog   sulod sa iyang lawak dihang misaka ang duha ka suspetsado ug gipusil ang biktima.

Nahiagom ang biktima og ubay-ubay nga mga samad sa lawas agi sa mga bala sa armas sa mga suspetsado.

Apan bisan pa niini gihapuhap lang ni Maravilla ang mga samad sa iyang lawas ug misirit siya ngadto sa Mactan Doctors Hospital.

 Nasuta sa kapolisan nga adunay kasuko ang mga suspetsado kang Maravilla sa pagtuo nga mao kini tig-report sa kapolisan bahin sa illegal nilang patigayon.

Padayon pang gipangita sa kapolisan ang mga suspek. - BANAT NEWS