Mga miyembro sa Newscoop nagkadaghan

CEBU, Philippines - Ang mga miyembro sa Cebu News Coop (CNC) nagkadagahan ug mitubo busa mitubo usab ang asset niini.

Apan ang mayoridad sa maong mga miyembro mga kawani sa The Freeman ug Banat News.

Ang CNC usa ka kooperatiba sa mga sakop sa media dinhi sa Sugbo nga natukod niadtong 1996 ug narehistro sa Cooperative Development Authority (CDA) sa mao gihapong tuig.

Sa sayo pa ang CNC   may 34 ka miyembro, ug niadtong 2004 misaka kini ngadto sa 301. Sa pagka-2010 miabot na ang mga sakop niini og 821.

Ang The Freeman   may 10 lang ka kawaning nagpa-miyembro niadtong 1996, ug sa pagka- 2010 miabot na og 200, diin 160 ra ang aktibo.

Ang Sun Star Publication sama sa The Freeman niadtong tuig 1996 may 10 ra ka mga kawani niini ang nagpamiyembro sa CNC, ug sa pagka-2010 misaka na ngadto sa 147 ang nagpamiyembro apan 82 ra usab ang aktibo niini.

Ang Broadcast nga gilangkuban sa radyo ug telebisyon sa tuig 1996 walay bisan usa nga nagpamiyembro, apan niadtong tuig 2010 may nagpasakop na nga  251 diin 66 lang ang aktibo niini.

Ang News Coop Associate walay bisan usa nga miyembro niadtong 1996, apan niadtong 2010 may nagpasakop na nga 122 ka kawani sa maong mga industriya .

Nagsunod ang Cebu Daily News nga dunay miyembro nga 52 apan 26 ray aktibo niini karon, apan niadtong 1996 walay bisan usa sa mga kawani niini nga nagpasakop sa CNC.

Ang CENEWOF niadtong tuig 1996 aduna kini 14 ka mga miyembro ug miabot kini og 21 sa tuig 2010 nga maoy aktibo sa pagkakaron.

Ang Sun Star printer adunay 12 ka miyembro apan walo lang ang aktibo karon.

Ang news dealer dunay 16 ka mga miyembro niadtong 2010 apan tulo lang ang aktibo niini karon.

Gilauman nga modaghan pa gyud ang magpamiyembro sa CNC.

Ang nahisgutang kooperatiba nagtanyag og nagkadaiyang loan services sama sa quick loan, SM card, livelihood, educational, bugas, appliance, motor vehicle ug petty cash.

Sa tuig 2010, ang katibuk-ang   kantidad nga napahuwam niini sa iyang mga miyembro mikabat og P12.650 milyones diin ang P10.17 milyones ang napahat ngadto sa quick loan.

Aron masuhito ug mapalambo pa ang maong kooperatiba ang mga sakop sa board, tagdumala ug staff   niini mipaubos sa seminar nga gipangunahan   sa VICTO, National Federation Of Cooperative (NATCCO) ug Cooperative Development Authority (CDA).

Niadtong Abril 16, 2011 ang CNC mipahigayon sa iyang ika-14 nga General Assembly didto sa Marcelo B. Fernan Press Center-CENEWOF Theater sa barangay Sudlon, Lahug, dakbayan sa Sugbo.

Atol sa maong assembly gipahigayon usab ang eleksiyon sa mga Board of Director (BOD), Audit Committee ug Election Committee.

Si John Rey Saavedra (The Freeman), Flor Perolina (The Freeman), Oscar Peneda (Sun Star Daily) ug Joseph Tubelan (Sun Star Daily) maoy bag-ong napiling mga BOD.

Si Emmie Lucena ug Faith Maroto parehong sa The Freeman ang mga napiling Audit Committee ug si Jovy Taghoy-Gerodias (Sun Star Daily) ug Debbie Duraliza (The Freeman) ang napiling mga Election Committee.  - BANAT NEWS