Gipusil sa wa ilhing kriminal angol

CEBU, Philippines - Anaa sa kritikal nga kahimtang ang usa ka menor de edad human kini pusila sa wala hiilhing mamumuno sulod sa usa ka diskohan didto sa barangay Subayon, syudad sa Toledo sa miaging kaadlawon.

Ang biktima nga si Ereneo Conahap Linihan Jr., molupyo sa sitio Dao, barangay Tubod sa maong siyudad kansang ulo maoy nasabak sa usa ka bala sa wala hisayring kalibre sa armas de fuego.

Sa inisyal nga imbestigasyon sa kapolisan nasayran nga ang biktima misayaw sa disko   atol sa piyesta sa maong lugar.

Apan sa tunga-tunga sa maong kalingawan nautingkay og kalit ang mga nanisko dihang kalit lang milanog ang buto sa armas de fuego.

Labing mialibwag og panagan ang mga nanayaw dihang nahagba ang biktima sa yuta ug naglunang sa kaugalingon niyang dugo.

Daling gisakwat ang biktima sa mga kahigalaan niini ug gihatod ngadto sa Toledo District Hospital apan dali kining gibalhin ngadto sa tambalanan sa syudad sa Sugbo.

Sa pakighinabi sa Banat News ni SPO3 Carmelito Hornales, sa Toledo City Police Station, nasayran nga nagduda sila nga may gikaaway ang biktima sulod sa diskohan apan wala nila kini matino.

Sa pagkakaron padayon pang gipangita sa kapolisan ang kriminal.  - BANAT NEWS