Lalaki gipatay sa tulisan atubangan sa uyab

CEBU, Philippines - Patay ang usa ka batan-ong lalaki samtang nakig-date sa iyang uyab dihang misukol sa tulo ka wala hiilhing lalaking tulisan diha sa 1st Mactan Mandaue Bridge, barangay Pajo, dakbayan sa Lapulapu.

Si PO2 John Carlo Jucotan sa Homicide Section sa kapolisan sa maong dakbayan miingon nga hangtud ning pagsuwat sa balita wala pa gihapon nila mailhi ang biktima sanglit ang uyab niini nagkurog pa ug dili pa makasulti samtang giatiman sa tambalanan.

Apan base sa pasiuna nilang kasayurang nakuha “Danny Boy” ang pangalan sa namatay kinsa nakaangkon og mga samad dinunggaban sa kalawasan ug gidakdakan pa og bato sa ulo.

Wala pay tagtungod nga mibisita diha sa ilang buhatan.

Matud pa ni Jucotan nga sa ilang pasiunang nahipos nga kasayuran nga samtang nagkukabildo ang managhigugmaay sa maong dapit kalit lang mitumaw ang tulo ka wala hiilhing tawo ug mideklarar og tulis ug dungan usab ang pagtion og kutsilyo.

Dihang gikuha ang shoulder bag sa babaye ug cellphone ug pitaka sa namatay giingong misulay pagsukol ang naulahi apan kalit lang gidunggab ug gidakdakan pa og bato ang ulo hangtod nga namatay.  - BANAT NEWS