CEBU, Philippines - Patay ang usa ka 18-anyos nga sakop sa Crips gang nga gipusil sa wala pa mailhing lalaki nga gituohang sakop sa kaatbang nga grupo sa mga batan-on sa barangay Tabok, dakbayan sa Mandaue alas-12 pasado ang takna sa miaging tungang gabii.
Ang namatay mao si Jeomar Obsequias, nagpuyo sa dalan P. Suico sa Upper Tabok sa maong dakbayan apan wala pa mailhi sa kapolisan ang mipusil sa biktima, dako ang pagdudang posibleng miyembro sa Bloods gang ang mamumuno.
Si PO1 Raniel Eleazar sa Investigation Detection and Management Bureau (IDMB) sa Mandaue City Police Office (MCPO) nagkanayon nga naglakaw ang biktima sa maong dapit kuyog sa pipila ka mga kauban dihang nasugatan ang karibal nga grupo ug sa kalit lang usa niini ang namusil.
Dali nga nanagan pahilayo sa maong dapit ang maong grupo ug wala na maabti sa kapolisan nga mitubag sa alarma sa maong dapit.
Ang biktima nga nakabaton og samad pinusilan sa iyang bukobuko ug uban pang bahin sa kalawasan dali untang gihatod sa mga kauban sa Mandaue City District Hospital apan human sa pasiunang pagtambal namatay kini. - BANAT NEWS