Sunog sa mall

CEBU, Philippines - Miulbo kagahapon sa hapon ang kaguliyang sulod sa Robinsons Place sa may Fuente Osmeña human sa nahitabong sunog sa usa sa mga tindahan sulod sa maong mall.

Ang Bureau of Fire Protection uban sa nagkadaiyang volunteer fire brigades ug rescue groups daling miresponde sa maong sunog nga giisa sa 2nd alarm, atol ning pagsulat sa balita padayon pang kombate sa mga bombero sa kalayo diha sa basement sa maong mall.

Ang mga guest sa kasikbit nga hotel nga mao ang Midtown Hotel temporaryong gipakanaog apan gipabalik ra dayon human masigurong layo na sila sa peligro.

Si Mayor Michael Rama kinsa miadto usab sa fire scene mimando kang Comar sa paghimo og lawom nga imbestigasyon sa nahitabo aron susihon kung unsay mga posibleng problema nga nahitabo ang sunog.

Buot masusi ni Rama kung nagsunod ba sa fire safety standards ang maong mall.

Ang Chief Investigator sa Bureau of Fire nga si Vivencio Talle, mibutyag nga base sa ilang nakuhang impormasyon nga nagsugod ang maong sunog sa ground floor sa usa ka boutique sa mga RTWs.

Hinuon dihang ilang gisusi ang maong tindahan dili tanang baligya niini ang nasunog. Sa report sa DyAB kagahapon, giingong adunay nadungog nga miulbo sa sulod nga gituohang gikan sa kable sa kuryente, apan wala pa kini gikompirmar sa kabomberuhan.

Apan gumikan sa kabaga nga aso nakamugna kini og karatol sa mga kustomer ug mga trabahante sa maong mall. Samtang sa mao gihapong radio report, giingong adunay usa ka lalaki ang naangol human molayat gikan sa ibabaw nga bahin padulong sa ubos.

Tungod sa bagang aso naglisod ang mga bombero pagsulod hinungdan nga gipamuak nalang nila ang mga bintana sa 2nd ug 3rd floor aron kini mohungaw.

Si Talle wala pa makabana-bana sa danyos sa maong sunog tungod kay wala pa nila mahinabi ang nag-abang sa maong boutique.

Samtang ang City Fire Marshall, Anderson Comar sa iyang bahin mibutyag usab nga ang tanang na-trap sa elevator sa maong mall ilang naluwas. Ang elevator nahunong sa pag-andar tungod sa pagkapawong sa kuryente.

Dunay mga empleyado ang mibutyag nga dunay mga fire alarms nga wala mogana maong wala sila dayon makapahibalo sa ilang mga kaubanan, gipasabot hinuon ni Comar nga dunay mga fire safety gadgets nga mag-agad sa temperatura sa palibot una pa kini mogana.

Gihulagway usab ni Comar nga ang tanang sprinklers diin mahitabo ang sunog migana maong adunay gipaabot nga madanyos tungod sa pagkabasa sa tubig.

Walay natalang nakalas gawas lang sa pipila ka mga nangaangol gumikan sa pagkahagbong ug pagsinghot sa bagang aso lakip na ang usa ka bomberong si FO1 Folbert Navarro kinsa daling gibubuan og tubig sa iyang mga kauban.

Ang Bureau of Fire sa syudad sa Mandaue nga mitabang og rescue sa dili mominos 50 ka mga guest sa Midtown Hotel. - Ug Lesley Caminade/EIM (BANAT NEWS)