Magpabendita og lukay gilaumang maghugop sa simbahan

CEBU, Philippines -  Gilauman nga libuan ka mga Sugbuanong Katoliko ang mohugop ngadto sa nagkadaiyang simbahan nga magbitbit og mga kurus nga lukay sa pagsaulog karong adlawa sa Palm Sunday o bendita sa lukay.

Ang bendita sa lukay mao ang timaan sa pagsugod sa Semana Santa, nga balaang mga adlaw sa mga Katoliko diin handumon ang sakripisyo ug pagpasakit, pagkamatay ni Hesukristo diha sa krus ug sa iyang pagkabanhaw.

Karong adlawa mao usab ang kapistahan sa malampusong pag-abot ni Hesus didto sa Jerusalem nga natala sa upat ka Canonical gospels sa Bibliya nga naglakip sa Mark (11:1-11, Matthew 21:1-11, Luke 19:28-44, ug John 12:12-19.

Agi’g pangandam sa maong kasaulogan, ang archdiocese sa

Sugbo mopahigayon og usa ka espesyal nga misa diin bendisyonan ang mga lukay sa mga deboto.

Ang Cebu Metropolitan Cathedral, isip inahang simbahan sa archdiocese miandam na usab sa schedule sa ilang mga programa alang sa tibuok Semana Santa ug lakip na niini ang “blessings of palms”, (bendisyon sa mga lukay) diin ang unang misa gitakda sa alas-7:30 sa buntag karong adlawa.

Samtang didto sa Basilica del Santo Niño pipila na usab ka mga manindahay ang miplastar sa ilang ibaligyang lukay.

Giklaro hinuon sa mga Kaparian ug sa simbahan nga ang lukay nagsimbolo sa paghangop sa pag-abot ni Kristo ug dili kini gamiton isip gamit aron i-abug ang dautang espiritu nga maoy dugay nang gituohan sa kadaghanan.

Sa iyang bahin, si Arsobispo Jose Palma adto mopahigayon sa Palm Sunday Mass sa lungsod sa Argao dungan usab sa pagtak-op sa 26th Local World Youth Day. (BDB)  (BANAT NEWS)