Balay giunay'g sunog sa bana ugdaw

CEBU, Philippines -  Maayong pagka-ugdaw sa balay sa usa ka ginang human kini unaya og sunog sa gihulagway niyang ‘praning-praning’ niyang bana didto sa barangay Duangan, lungsod sa Pinamungajan sa miaging hapon.

Si Lolita Brown, nagtibi nga misumbong sa kapolisan human maugdaw ang balay niini nga semi-concrete kay gidauban sa iyang bana nga si Charlie Brown nga usa ka mestiso Amerikano.

Sa pakighinabi sa Banat News ni PO1 Marcelo Inso, sa Pinamungajan Police Station nasayran nga si Lolita midangop sa ilang buhatan aron sa pagsumbong sa nasunog niyang balay.

Miresponde sila apan wala nila mapawong ang kayo hangtod nga naugdaw ang maong balay.

Samtang ang bana usab ni Lolita nga si Charlie, naabtan nila kini sa sulod sa balay  nga nagpaninggit og “Party Party”.

Gibana-bana ni Inso nga mokabat og P100 mil ang danyos sa nasunog nga balay ni Lolita.

Midugang si Inso nga base sa mga estorya sa mga silingan sa biktima nga ‘praning-praning’ kuno si Charlie tungod kay tiggamitan kini og ginadiling drugas apan ila pa usab kining sutaon.

Gibutyag usab ni Inso nga si Charlie nakaangkon og paso sa iyang tuong kamot.

Si Charlie kasamtangang nagtingkagol karon sa karsel sa kapolisan sa Pinamungajan samtang nagpaabot pa kini sa lakang nga pagabuhaton sa iyang asawa alang sa kasong ipasaka niini batok kaniya. (BANAT NEWS)