Lola nagbisekleta dasmagan, patay

CEBU, Philippines -  Patay ang usa ka biker nga lola human kini dasmagi   sa usa ka hit and run nga sakyanan samtang siya nagbisekleta didto sa barangay Tayud, lungsod sa Liloan kagahapon sa alas 2:00 pasado sa kaadlawon.

 Ang biktima mao si Gloria Aquinod, 73, minyo, nga nagpuyo sa maong dapit samtang ang nakadasmag mao ang SUV nga sakyanan nga gimaneho sa wala hiilhing driver nga kusog kaayong mipabulhot sa pagpadagan.

Si PO3 Raul Flores sa traffic section sa kapolisan sa maong lungsod miingon nga usa ka Wendel Malait, 19 , nga usa ka drayber habal-habal sa maong lugar maoy usa sa nakamatikod sa paglagapak sa biktima sa karsada kay nadasmagan sa sakyanan, hinungdan nga gigukod dayon niya ang sakyanan apan wala kini hiapsi.

Matud pa ni PO3 Flores nga base sa ilang imbestigasyon nasuta nga naandan na sa biktima ang pagsakay og bisiklita sa matag kaadlawon sa pagtambong sa awrora nga ilang pagahimoon uban sa mga relihiyosang mga silingan.

Dugang pa niya nga paingon unta ang biktima sa nahimutangan sa iyang mga silingan nga nagtapok sa usa ka balay sa maong lugar kay ilang iprosesyon ang ilang Santos.

Samtang nagpadagan sa iyang   bisiklita, nasugatan niini ang naghaguros nga SUV gikan sa dakbayan sa Mandaue ug paingon sa amihang lungsod sa lalawigan sa Sugbo.

Dugang pa ni Flores nga dihang milugapak ang bumper sa sakyanan, nalagpot usab ang biktima nga maoy hinungdan sa grabeng kadaut sa kalawasan niini.

Si Dr. Francisco dela Cuesta nga maoy municipal health officer sa maong lungsod maoy nagdeklarar nga patay na ang biktima. (BANAT NEWS)