P20 milyon nga cocaine sakmit

CEBU, Philippines -  Nasakmit sa kapolisan ang cocaine nga balor og P20 milyones ug nasikop usab ang duha ka level 2 drug pusher nga maoy nagpalusot niini, didto sa barangay Pajo, dakbayan sa Lapulapu kagahapon sa buntag.

Ang nasikop sa mga sakop sa Anti Illegal Drug Special Operations Task Force (AIDSOTF) Special Operation Unit 3 uban sa taga RAIDSOTF sa usa ka fastfood chain sa Brgy. Pajo mao sila si Eric Balansil, 34, lumad   nga taga dakbayan sa Tacloban ug Darwin Debuque alyas David, 36, minyo, nga taga Brgy. Tan-awan,Leyte.

Matud pa ni P/SSupt. Ismael Fajardo sa AIDSOTF nga dugay na nilang gipanid-an ang mga kalihukan ni Balansil ug Debuque sa ilang pagpamaligya og kinilong cocaine sa nagkalainlaing dapit sa nasud.

Nasayran nga kining mga tawhana maoy tig-supply og cocaine sa ilang mga suki sa rehiyon 6,7 ug 8, samtang ang uban nilang kauban tua maglihok sa kaulohan, sumala sa kapolisan,.

Gumikan kay gihulagway nga level 2 drug pusher ang duha ka suspetsado ang mga sakop sa AIDSOTF nga nagbase sa kaulohan nakadawat og kasayoran nga sa dakbayan sa Lapulapu nagpahigayon og transaksiyon ang mga suspetsado pinaagi sa pagpamaligya og kinilong cocaine hinungdan nga ila kining gisundan ug gihimo dayon ang   buy-bust operation.

Kagahapon sa alas 8:50 sa buntag sayo kaayong milampos ang mga otoridad sulod sa usa ka kan-anan diin namahaw ang mga suspetsado ug wala kaugpo dihang giposasan sila sa mga otoridad.

Atol sa operasyon nasakmit sa kapolisan ang gibanabanang 3.45 kilos nga cocaine nga mobalor og P20 milyones lakip na ang marked money nga nagkantidad og P1.4 milyones.

Matod pa ni Mayor Paz Radaza sa dakbayan sa Lapulapu nga mas maayong mahurot ang mga tigpayuhot og ilegal nga drugas sa dakbayan sa Lapulapu pinaagi sa operasyon sa kapolisang nadestino sa Lapulapu ug sa naggikan sa kaulohan.

Kini maoy iyang mensahe ngadto sa mga drug pusher nga buot mohimo sa ilang operasyon sa dakbayan sa Lapulapu nga nagkanayon seryuso ang kampanya sa kagamhanan karon batok sa illegal nga drugas , sumala pa ni Radaza

Samtang si Lapulapu City Police Office Director P/SSupt. Anthony Obenza mipadayag nga wala siya’y nadawat nga taho nga adunay mga cocaine nga gibaligya sa lalawigan sa Sugbo ug sa dakbayan sa Lapulapu.

Gipasabot ni SSupt. Obenza nga gikan sa kaulohan ug sa ubang dapit sa Visayas ang maong mga drugas nga gipamaligya sa bisan asang dapit sa nasud.

Ang duha sa suspetsado anaa karon gibalhug sa prisohan sa PRO 7 samtang gisang-at na sa kapolisan ang tukmang kaso batok sa mga suspek nga may labot sa paglapas sa Art. II sec. 5, 11 ug 12 sa RA 9165. (Uban sa report ni Mei Rubie Licera SWU /WC)  (BANAT NEWS)