CEBU, Philippines - Natusak sa bala ang lawas sa usa ka tawo nga gipusil patay sa wala hiilhing kriminal didto sa bukirang bahin sa sitio Tuburan sa barangay Tawason, dakbayan sa Mandaue.
Si Inspector Ramil Morpos, homicide chief sa Mandaue City Police Office (MCPO) miila sa biktima nga si Harold Seno Oporto, 38, taga sitio Bacayan, barangay Talamban sa dakbayan sa Sugbo.
Matud pa ni Morpos nga ang barangay tanod sa Tawason nga si Jovy Bonlosan maoy unang nakadiskubre sa patay’ng lawas sa biktima dihang nahiagi kini sa maong lugar ug maoy mipahibalo sa ilang buhatan.
Ang biktima may unom ka mga samad pinusilan sa iyang tiyan ug uban pang bahin sa kalawasan nagbuy-od sa kasagbutang bahin sa maong lugar.
Dugang pa niya nga wala sila makakaplag og kabhang sa mga bala sa armas nga gigamit sa pagpatay sa biktima busa nagtuo sila nga igo lang kining gilabay sa maong lugar.
Si Inspector Morpos miingon ang biktima giila sa iyang mga kabanay kinsa nasayud sa hitabo dihang nabaniog na sa ilang palibot ang balita kalabot sa tawong gipusil patay.
Dugang pa ni Inspector Morpos nga ang mga sakop sa pamilya sa biktima mitug-an nga ang namatay ilang giisip nga badlongon sa ilang pamilya ug gani magsulod ug gawas na lamang kini sa bilanggoan ug tulo ka tuig na usab ang nakalabay nga wala na kini mahiuli sa ilang balay. (BANATNEWS)