Gwen ug mga alalay gilugwaya'g 10 ka adlaw

CEBU, Philippines - Gilugwayan og napulo ka adlaw ang mga sakop sa hunta probinsiyal sa Sugbo nga nalambigit sa kaso sa pagpalit sa luna sa Balili sa pagduso sa ilang tubag sa buhatan sa Ombudsman.

Apan ang masakiton nga si Bise-Gob. Gregorio Sanchez, Jr., gikatakda na nga mosang-at sa iyang tubag karong Lunes sumala pa sa iyang abogado, nga si manlalaban Oliveros Kintanar.

Matud pa sa kasamtangang bise gobernador, Bokal Agnes Magpale nga usahon ra nila ang ilang tubag sanglit pareho man ang ilang kaso gawas kang Bokal Juan Bolo.

Lahi nga kaso usab ang atubangon ni Gob. Gwendolyn Garcia.

Matud pa ni Provincial Legal Officer Marino Martinquilla nga personal nga abogado ang nag-atiman sa kaso ni Garcia sanglit dili siya mahimong makalaban niini.

Nadawat sa mga hingtungdang opisyal ang kamandoan sa Ombudsman niadtong Abril 6 ug mapupos ang napulo ka adlaw nga tagal karong Lunes.

Ang Ombudsman-Visayas mipasaka sa kaso batok sa mga opisyal sa Kapitolyo aron mahusay ang giingong anomalosong pagpalit sa luna sa Balili sa dakbayan sa Naga nga balor og P99 milyones.

Giingong ang daku nga bahin sa luna anaa ilawom sa dagat. (BANATNEWS)