Gwen himuong modelo sa DA
CEBU, Philippines - Personal nga miduol sa buhatan ni Gobernador Gwendolyn Garcia ang Time Studio Media Marketing(TSMM) sa Department of Agriculture (DA) sa miaging adlaw.
Kini aron ilang makuha ang habig sa gobernadora, nganong mahiligon sa pagkaon og mais ang gobernadora.
Si Loralee Mernado, ang segment producer sa TSMM sa DA Central Office miingon nga iyang nasayran nga ang gobernadora hilig nga mokaon og mais sukad pa sa iyang pagka bata hangtud karon bisan pa og nahimo na kining inilang gobernador sa lalawigan sa Sugbo.
Si Mernado giubanan ni Roberto Castro, ang director sa TSMM , mga tv crew nga sila si Jaime Malicdem ug Emmanuel Padilla ug ingon man ang guest sa DA-7 nga sila si Gemma Garcia ug Bethsaida Bustamante.
Sa maong higayon personal nilang gipangutana ang gobernadora kun unsa ang mga kaayohan nga makuha sa mga katawhan kung mais ang pagakan-on.
Sila diretso nga gitubag sa Gobernadora nga daku gayud kaayo ang kalainan kay sa mais nasinatian niya nga dili siya daling kapuyon bisan og magsunod sunod pa ang iyang mga meeting. Matud pa sa gobernador nga alang kaniya ang mais maayo usab kaayo alang sa panglawas sa tawo.
Si Mernado miingon nga tungod sa ilang nahibaw-an gikan sa gobernador kansang paborito mao ang bugas mais, ang buhatan sa DA nagtinguha karon nga isangyaw pag-ayo ang kasayoran bahin sa kamahinungdanon sa lawas sa pagkaong mais. Sigun pa ni Mernado nga aron mas epektibo ang ilang pag-promote sa pagkaon og bugas mais ilang kuhaon isip modelo si Gobernador Garcia mismo.
Ang ilang interview kang Garcia ilang ipagawas sa mga Government Channel ug ipang apod-apod sa tanang mga opisina sa DA sa tibuok nasud sa Pilipinas. (BANATNEWS)
- Latest
- Trending
