DOH nangandam sa Semana Santa

CEBU, Philippines - Gi-alerto na usab karon sa Department of Health (DOH)-7 ang tanang mga tambalanan nga iya sa gobyerno dinhi sa Sugbo ug sa tibuok Central Visayas nga pagpangandam sa nagsingabot nga mahal nga adlaw kon semana santa karung Abril 21 ug 22 ning bulana.

Nunot niini gipahibawo ni DOH-7 Regional Director. Susana Madarieta nga wala na usay mga doctor ingon man mga nurse sa tanang publikong tambalanan ang gitugotan nga makabakasyon aron pagsiguro nga kompleto sa mga hospital personnel ang mga tambalanan atol sa maong mga adlaw.

Gipasabot ni Dra. Madarieta nga ang tuyo nila nga aron ang tanang mga tambalanan andam sa tanang higayon sa pagtubag sa bisan unsang mga motumaw nga emerhensiya atol sa semana santa.

Gipaabot ang pagdasok sa mga tawo sa   palibot sa pantalan ug bus terminal sa   sunod semana hangtud na sa Miyerkules Santo ug Huwebes Santo niadtong buot mamauli sa ilang tagsa tagsa ka probinsiya aron adto didto mag-obserbar sa mahal nga adlaw.

Ang DOH-7 kompleto usab karon og mga tambal nga magamit sa mga katawhan atol sa maong okasiyon.

Gani ang kabomberohan alerto usab ning maong mga adlaw aron pagmonitor sa mga motumaw nga alarma sa sunog nunot usab sa kainit sa panahon ug pagka-busy sa mga sakop sa pamilya pagbisita sa mga sam-ang ug pagtambung sa mga Santos nga misa ilabina sa Biyernes santo ug sa Sugat sa pagka adlaw’ng Domingo. (BANATNEWS)