1 angol, 3 ka balay ugdaw sa sunog

CEBU, Philippines - Usa ang angol samtang gibana-banang mokabat   sa P300 mil ang danyos sa sunog nga miugdaw sa tulo ka balay lakip na ang opisina sa usa ka konsehal didto sa barangay Cabitoonan siyudad sa Toledo kagahapon sa alas 6:45.

Ang mga naugdaw    nga pinuy-anan gipanag-iya sa magtiayong Porferio Doleno, 74, ug asawa niining si Emilia Doleno 75, samtang ang igo lang nakan-an sa kayo mao ang opisina nga gipanag-iya ni manlalaban Leo Doleno nga konsehal usab sa siyudad sa Toledo .

Ang ikatulong nakan-an sa kayo wala na makuha ang ngalan kay wala diha sa maong hitabo

Matud ni Capt. Randy Mendaros, fire marshal sa siyudad sa Toledo nga ang alarma sa sunog nadawat nila alas 6:45 sa buntag ug diha-diha gipaubos dayon sa 2nd alarm.

Ang mga bomberong naka-respondi dayon sa maong alarma   mao ang taga Pinamungajan ug Balamban.

Matud ni Mendaros nga sulod lang sa 10 minutos   nakontrolar    ang kayo hinungdan nga wala na kini makapadayon pagkaylap ngadto sa kasikbit nga daghang balay.

Subay sa inisyal nga imbistigasiyon ang sunog naggikan sa bakanting kwarto sa pinuy-anan sa pamilyang Doleno nga mao nalay nagpuyo kauban ang ilang katabang.

Gituohan sa kabomberohan nga faulty electricial wiring ang hinungdan sanglit nasunog man ang plangka sa kuryente niini.

Napaso usab si Porferio   dihang mibalik sa kini pagsulod sa nasunog nga balay aron pagguyod sa iyang asawa nga nahabilin sa kwarto kay hinay na molakaw.

Gikuha usab niya ang vault nga hiposanan nila sa ilang kuwarta. Kini maoy hinungdan nga napaso sa tangkugo ug mga kamot si Porferio. (BANATNEWS)