Giulo pagpusil iyang kaduwa sa billiard

CEBU, Philippines - Naangol ang usa ka tawo kinsa giulo pagpusil sa gikaduwa niya sa billiard   didto sa sitio Camase, barangay Pajo, dakbayan sa Mandaue sa miaging gabii.

Ang biktima mao si Jerson Eraclio, hingkod nga nagpuyo sa maong dapit , samtang ang suspek mao usab si Raul Peonti, hingkod ug lumad nga taga barangay Curba, lungsod sa Carmen.

Si PO2 Carlos Baluado sa homicide section sa kapolisan sa maong dakbayan miingon nga samtang nagduwa og billiard ang duha kalit lang mitumaw ang ilang panaglalis.

Apan ang suspetsado kinsa naupsan sa pailob, miundang sa sinukliay sa mga hait nga pulong ug milanit sa iyang armas de fuego dayong pusil sa biktima nga maoy nakapaundang sa ilang lalis.

Nahilom ang biktima kay giulo pagpusil sa suspetsado ug bisan ang mga nakasaksi wala dayon makalihok   human sa maong hitabo.

Gihatod dayon ngadto sa Lapulapu City District Hospital   ang biktima apan gibalhin usab dayon kini ngadto sa Vicente Sotto Memorial Medical Center sa dakbayan sa Sugbo samtang ang suspetsado dali kaayong nakasibat human sa hitabo. Sa pagkakaron gipangita na   sa kapolisan ang suspek. (WC) (BANATNEWS)