Kapolisan mihimakak nga nanghasi sa suspek sa Pique case

CEBU, Philippines - Giklaro ni Sr. Supt. Patrocinio Comendador, tigpamaba sa task force nga wala sila mangharas sa kampo ni Bella Ruby Santos kundili ang ilang mga testigo mao hinuoy gipangharas sa mga giingong sinuholan sa kampo ni Santos.

Matud ni Comendador sila na hinuon ang gibali sa kampo ni Santos aron ipalabas sa publiko nga sila maoy nangharas nga unta anaa man kanila ang mga testigos sa kaso ni Ellah Joy.

Mitataw si Comendador ang iyang mga imbestigador nangreklamo gani human nasutang gisigehan og adto ang ilang mga testigos sa mga lalaking kadudahan ang mga lihok.

Si Santos sa usa ka interbyu sa TV Patrol Central Visayas niadtong Huwebes kusganong mihimakak sa mga alegasyon ni Comendador nga nang-harass sila sa mga testigos.

Bisan paman sa mga giingong pagpanghasi, nagtuo si Comendador nga anaa gihapon kanila dapig sa hustisya ang mga testigos. Gibutangan na usab og seguridad ang maong mga testigos.

Subling gitug-an ni Comendador nga tun-an sa task force ang pagpasaka og kaso batok ni Kapitan Narciso Tablate tungod sa pagtago sa impormasyon kabahin sa isyu sa cyber sex operation diha sa iyang barangay sa Inayagan Naga.

Nagtuo si Comendador nga gi-tolerate sa kapitan ang operasyon sa cyber sex sa iyang barangay tungod kay iya man kining konstituwente.

‘This is ongoing activity. Gani manghakot sila og supporters because they are afraid nga molugwa ang tinuod,” pasabot pang Comendador ngadto kang Santos nga nagdala og daghang supporters atol sa hearing.

Matud pa niya nga usa sa mga kabanay ni Santos miingon kanila nga si Santos na gyud ang tinuod nga suspetsado sa pagdagit ug pagpatay kang Pique uban sa iyang hinigugma nga si Ian Charles Griffiths.

Samtang atol sa hearing sa mosyon sa Criminal Investigation and Detection Group nga motion for partial reconsideration aron ipabilin sa kostudiya sa kapolisan ang Mitsubishi Pajero ni Bella.

Ang maong Pajero maoy gituohang gigamit sa pagsignit ug paglabay sa patay’ng lawas ni Pique apan nakwestyon tungod sa giingong iregularidad sa plaka niini.

Si Executive Judge Meinrado Paredes misukit-sukit sa kapolisan kabahin sa pagkostudiya sa maong sakyanan, lakip sa gipangutana mao si Tablate. Nunot sa walay resolusyon sa maong mosyon ipabilin una gihapon sa kostudiya sa kapolisan ang maong sakyanan. (BANATNEWS)