Mga batan-on mosalmot sa World Youth Day

CEBU, Philippines - Dul-ang 400 ka mga kabatan-onan sa nagkadaiyang dapit sa Kabisay-an ang mosalmot sa tinuig nga Local World Youth Day karong adlawa didto sa Brgy. Poblacion, sa lungsod sa Argao, lalawigan sa Sugbo.

Ang maong Katolikanhong kalihokan ipahigayon sulod sa upat ka adlaw nga walay laing buhaton gawas sa pag-ampo, katekismo ug uban pang buhatunon sa simbahan.

Nasayran nga unang gisugdan ang Local World Youth Day niadtong tuig 1989 ni kanhi Arsobispo sa Sugbu Ricardo J. Cardinal Vidal didto sa tugkaran sa Archbishops Palace ug sukad niadto matag tuig ipahigayun na ang maong kalihukan.

Gituyo usab ang pagbalhin-balhin sa lugar nga himoanan sa maong kasaulogan matag tuig sama karong tuiga nga adto kini ipahigayon sa lungsod sa Argao   kay mao may moalagad ang parokya sa San Francisco de Assisi sa maong dakbayan.

Ning tuiga, ang World Youth Day nga nagdala sa tema nga “Rooted and built up in Jesus Christ, firm and faith,” ipahigayon didto sa nagkadaiyang dapit sa Argao nga maglakip sa St.Michael School of Argao, Argao Parish Church, Cebu Technical University Oval ug   Pres.Diosdado Macapagal Sports and Cultural Center.

Usa usab sa hatagan og gibug-aton sa maong kasaulogan mao ang pagtambong ni Archbishop Jose Palma kinsa makighimamat sa mga kabatan-onan atol sa “Dialogue with the Archbishop, diin tubagon ni Palma ang mga nagkadaiyang pangutana sa mga kabatan-onan mahitungod sa mga isyu nga may kalambigitan sa katilingban ug simbahan.  - BANAT NEWS