CEBU, Philippines - Mga opisyal sa kabarangayan giawhag sa konseho sa dakbayan sa Talisay sa higpit nga pag-monitor sa mga dapit nga posibleng pahigayonan sa cybersex.
Giaprobahan sa Konseho sa Talisay atol sa ilang regular nga sesyon niadtong Martes sa buntag ang resolusyon nga giduso ni Konsehal Danny Caballero nga nagtumong sa nahisgutang katuyoan.
“The Provincial Council for the Welfare of Children (PCWC) said that children trafficking and sexual abuse remain a grave concern”, kini tipik sa Resolusyon Numero 2011-13-1 nga giduso ni Caballero.
Ang nahisgutang konsehal migama sa maong resolusyon human sa mga mikatap nga report bahin sa mga batan-ong mga babaye kinsa nabiktima sa mga sindikato sa cybersex.
Base usab sa nahipos niyang report nga mikabat na sa 50 ka mga balay sa Metro Cebu ang giingong nag-operate og cybersex. Si Caballero mipasabot nga ang pagduso niya sa nahisgutang resolusyon panagana nga dili maabot sa Talisay ang cybersex.
Nasayran base sa report nga nagkadaghan na ang mga batan-ong babaye ang napugos sa pagpahigayon og pornograpiya sa internet tungod sa kalisud sa pamuyo.
Matud usab ni Caballero nga sa nahipos niyang report nasayran nga ang mga inahan sa maong mga batan-ong mga babaye bayaran lang og P200 kun motugot sa ilang mga anak nga pahuboon ug kuhaan og hulagway sulod sa internetan samtang ang mga internet operator, bayaran usab og $30 sa matag kostumer nilang mga langyaw. Sa laing bahin, bisan nga wala pa maduso ang nahisgutang resolusyon ang kapolisan sa dakbayan sa Talisay nagpahigayon og higpit nga pag-monitor sa mga internet café sa siyudad.
Kahinumdoman nga kaniadto adunay mga report nga may mga internet cafe sa barangay Tabunok nga giingong adunay mga private room diin may mga batan-ong babaye nga giingong maghubo samtang makig-chat sa ilang mga langyaw nga chatmate unya bayaran sila niini. Human makadawat og report ang kapolisan giinspection dayon nila ang mga internetan sa siyudad. - BANAT NEWS