Aids Free makigalayon sa DepEd

CEBU, Philippines -   Makig-alayon sa Department of Education (DepEd) ang Aids Free Philippines aron pagpalig-on sa kampanya sa pag-edukar sa publiko aron malikayan ang mikuyanap nga makamatay nga human immuno virus (HIV) nga mosangpot ngadto sa pagka-acquired immuno difficiency syndrome (AIDS).

Mao kini plano ni Dr. Rene Josef Bullecer sa Aids Free Philippines human niini gihulagway ang makuyaw kaayong pagsaka sa gidaghanon sa mga tawong natakboyan sa HIV dinhi sa dakbayan ug sa nasud.

Gani gibutyag niya nga ang labing awahing natakboyan sa HIV mao ang usa ka 34 anyos nga lalaki nga gihulagway niyang usa ka free lance prostitute nga taga dakbayan sa Sugbo ug nadiskobrehan nga positibo sa maong virus sa naghinapos nga bahin sa miaging Marso.

Matud niya nga nagpahigayon sila karon og contact tracing sa mga higala niini ilabina na niadtong gikadug niini sa kama pagsuta kun wala ba sila matakdi sa maong virus.

Matud ni Bullecer nga base sa datus nga ilang nahipos gikan niadtong 1995 hangtud sa pagtapos sa milabay’ng bulan sa Marso, mikabat na og 319 ang kaso sa positibo sa HIV.

Nunot niini gitakdang makig-alayon si Bullecer sa DepEd aron palapdan ang kampanya ug impormasyon batok sa maong makamatay nga virus pinaagi sa paglakip niini sa mga itudlong leksiyon sa mga tinun-an sa eskuylahan.

Tinguha niya nga kasugdan kini atol sa umaabot nga pagbukas sa klase karong Hunyo aron hingpit nga masayran sa publiko ang paagi sa paglikay ning maong matang sakit nga makamatay. (BANAT NEWS)