Dalan sa Larsian abli na

CEBU, Philippines -  Hingpit na nga giablihan sa Kapitolyo kagahapon ang karsada nga kanhi nahimutangan sa Larsian Barbeque tupad sa Robinson’s Cybergate. Bugti niini, giuli na usab sa kagamhanan sa dakbayan sa Sugbo ang trailer truck sa Kapitolyo nga gisakmit sa City Traffic Operations and Management gumikan sa giingong ilegal nga pag-parking niini sa nahisgutang karsada isip babag nga dili na maagian ang maong agianan.

Sila si Gobernador Gwendolyn Garcia ug Cebu City Mayor Michael Rama ang nagbayloay kagahapon og suwat isip kasabutan sa duha ka habig. 

Nunot niini, isibog na sa Kapitolyo ang kaso nga ilang gipasaka batok sa CITOM pinaagi sa pagduso sa compromise agreement ngadto sa korte nga nagmatuod nga aduna na’y nakab-ot nga kasabutan ang duha ka habig.

Nasayran nga mibawos ang Kapitolyo pinaagi sa pagpasirado sa karsada sa luna nga gipanag-iya niini human babagi ni kanhi mayor ug karon Kongresista Tomas Osmeña ang Ciudad Project sa may Banilad-Talamban area.

Si Garcia nanghinaut nga ang pag-abli sa maong karsada mahimong simbolo sa pag-abli pa sa ubang kahigayonan alang sa maayong relasyon tali sa syudad ug probinsiya sa Sugbo. (BANAT NEWS)