VECO mipahimangno sa magpalupad tabanog

CEBU, Philippines -  Ang Visayan Electric Company (VECO) mangampanya batok sa mga magpalupad og tabanog duol sa mga linya sa kuryente niining panahon sa summer kun ting-init aron malikayan ang disgrasya.

Karong Abril 16, 2011 adlaw’ng Sabado, may 50 ka mga volunteer nga kawani sa VECO ang mosuroy sa unom ka lugar nga paboritong paluparanan og tabanog nga mga barangay sa dakbayan sa Sugbo.

Ang nahisgutang mga barangay mao ang Guadalupe, Labangon, Tisa, Quiot ug Cogon -Pardo, Basak San Nicolas ug Duljo- Fatima. Ang VECO subling mopahimangno sa publiko bahin sa kadelikado sa pagpalupad og tabanog duol sa mga linya sa kuryente ug gani may   mensahe sila nga nagkanayon “Ampingi ang imong kinabuhi, ayaw pagtabanog duol sa linya sa kuryente”.

Matag summer ang VECO magpahimatngon sa publiko nga adto magpalupad og tabanog sa lapad nga lugar nga dunay gilapdong dili mo-ubos sa 3,000 metro kuwadrado ug layo sa mga linya sa kuryente.

Ang Cebu City Ordinance Numero 1471 usa ka ordinansa nga nagkontrolar sa pagpalupad sa mga tabanog ug hugtanong nagdili sa pagpalupad niini sa mga kadalanan, tulay, agianan ug sa mga lugar nga adunay mga linya sa kuryente, telepono ug uban pang mga linya. Ubos usab sa maong ordinansa ang mga batang nagpanuigon ubos sa 12-anyos dili tugotan nga manabanog kung wala kini kuyog nga dagku.

Ang makalapas sa ordinansa pamultahon og P200 o bilangguon sulod sa lima ka adlaw.

Usa sa problema sa VECO nga bisan sa ilang kampaniya matag tuig dunay ang mga tawo dili gyud mamati ug motuman niini apan magpadayon gihapon sa pagpanabog sa mga ginadiling lugar.

Niadtong Abril 2008 usa ka 13-anyos nga batang lalaki nga taga barangay Cogon- Ramos ang nakaangkon og 3rd degree burn ug nalabay kini pipila ka metros human makuryentehi. Ang maong bata migamit og 10-piyes nga aluminum nga kuhit ug gikuhit ang iyang tabanog nga nasangit sa 69kV primary line sa VECO. Ang maong kuhit nga gigamit sa bata nabag-id sa linya sa kuryente nga maoy hinungdan sa iyang pagkadisgrasya ug sa pag-brown-out sa lugar.

Ang VECO miawhag sa publiko nga dili na kuhaon ang tabanog nga masangit sa linya sa kuryente kundili i-report kini ngadto sa VECO pinaagi sa pagtawag sa mga numero sa telepono 230-8326. (BANAT NEWS)