Polis nakatagpilaw og drive misampak sa poste patay

CEBU, Philippines -  Patay ang usa ka polis human ang iyang kotse nga gisakyan mibangga ngadto sa poste sa kuryente kagahapon sa mga alas 3:00 sa kaadlawon diha sa national highway sa sitio Pungtod, barangay Calajo-an, lungsod sa Minglanilla. Ang namatay mao si PO2 Ivan Ray Juarez, 34, taga barangay Poblacion, dakbayan sa Talisay ug bag-ohay lang nga nadestino diha sa Naga City Police Station gikan sa Talisay City Police Station.

Si Juarez nakaangkon og grabeng kadaot sa iyang ulo, bali sa tuong paa, ug nabuak ang bagol-bagol niini tungod sa pagkapiit niya diha sulod sa iyang Mitsubishi Lancer nga kotse.

Si PO2 Edsel Ricablanca sa Minglanilla Police Station kinsa maoy miresponde sa hitabo nga nahinabi sa Banat News mitug-an nga mitapon sa pikas lane si Juarez.

Nagduda silang kusog gyud ang pagpadagan sa maong polis hinungdan nga wala na siya makakontrol sa manobela ug mibangga sa poste sa kuryente.

Tungod sa kakusog sa impact, nabali ang poste ug ang ligid sa wala nga bahin miabot na ngadto sa manobela diin siya napiit. Milanat pa og 30- minutos una pa kini naugkat sa iyang sakyanan. Si Ricablanca midugang nga atol sa maong hitabo si Juares nakasul-ob pa og half uniform sa PNP.

Nagtuo si Ricablanca nga nakatulog si Juares samtang nagmaneho sa iyang sakyanan tungod alas-4 pasado pa sa kaadlawon kini nahitabo ug walay nakitang skid-mark sa karsada nga nagpasabot nga mi-apply pa unta kini og brake. 

Human maugkat gisuwayan pa’g dala sa Minglanilla District Hospital apan gideklarar kini nga dead on arrival (DOA).

Si Luz Juarez, 35, asawa sa biktima nga nahinabi sa Banat News kagahapon mibutyag nga ang kalibre .45 nga pistola nga service firearms sa iyang bana nawagtang.

Gikataho nga si PO2 Juarez nananghid sa iyang mga kauban nga mopauli makadiyot aron mokuha sa iyang uniporme tungod kay giingong dunay inspeksyon kagahapon sa buntag. 

Si PO1 Junaierie Latorre, Desk Officer on Duty sa Naga Police Station nga nahinabi sa Banat News nagkanayon nga morag nag ‘merida’ nang daan si Juares niadtong Lunes nga mi-duty niadtong higayona.

Matud ni Latorre nga nahibulong siya niadtong Lunes sa udto nagtan-aw og salida sa telebisyon ang biktima estoryador kini kaayo nga hilomon man unta kini sama sa iyang mga kaagi kaniadto. (BANAT NEWS)