Mipatay sa kapuyo gikiha na

CEBU, Philippines - Gipasakaan na og kasong double murder sa Toledo City Prosecutor’s Office ang drayber sa traysikol kinsa gipasanginlang mitigbas patay sa iyang kapuyo ug sa iyang higala.

Ang maong insidente nahitabo didto sa sitio Calubihan, barangay Ilihan, Toledo sa milabay’ng semana.

Ang suspetsado nga si Armando Ortiz, 52-anyos, taga sitio Calubihan sa maong siyudad giingong maoy tag-iya sa balay nga   giinoman ni Lito Blanco, 27, uban sa iyang kapuyo nga si Mercidita Manundo, 37, kinsa niadtong higayona lima ka buwan nga mabdos, ug sa pipila nila ka higala.

Si SPO4 Gil Lastimosa sa Toledo City Police Station nagkanayon nga si Ortiz ug Blanco samtang nag-inom nagkomedyahanay kini apan nakurat nalang sila dihang mipadayag og kasuko kanila ang suspetsado kinsa nakapaminaw sa komedya ni Blanco.

Unya si Ortiz misulod sa ilang kusina ug sa pagbalik niini nagbitbit na og sundang ug gihabas dayon si Blanco busa nababha ang likod niini nga maoy hinungdan sa kamatayon sa biktima.

Si Manundo midagan paingon ngadto sa gawas sa ilang balay human niya makita ang gibuhat ni Ortiz apan naapsan siya ni Ortiz ug gipanigbas usab ug namatay.

Human sa maong hitabo si Ortiz milayas dayon samtang ang ilang mga silingan nangayo og panabang ngadto sa mga polis. Ang suspetsado nasikop usab dayon kini sa mga polis.   - (BANAT NEWS)