Gilapsan sa bala, patay

CEBU, Philippines - Patay ang usa ka mag-uuma human kini lapsi sa bala gikan sa mipusil kaniyang bayong-bayong nga iyang silingan didto sa barangay Kana-an, lungsod sa Tuburan sa miaging adlaw.

Ang biktima nailhan nga si Apolinario Paring, 38, nga taga Kana-an, samtang ang suspetsado usa ka 16 anyos nga ulitawo nga silingan sa biktima. Ang biktima naigo sa bukobuko apan ang bala milapos sa iyang dughan nga maoy hinungdan sa hinanaling kamatayon niini.

Sa pakighinabi sa Banat News ni SPO3 Carlo Canseko, nasayran nga ang biktima naglakaw sa maong lugar dihang gikasugat niya ang suspetsado apan wala siyay kalibotan nga milanit ang naulahi sa armas de fuego ug gitirohan ang bukobuko sa biktima nga nagpadayon sa paglakaw. Dihang nahagba sa yuta ang biktima miikyas usab dayon ang suspetsado.

Matud pa ni Canseko nga gikahinabi niya ang asawa sa biktima ug kini mibutyag nga daan nang nagdumot ang suspetsado ngadto sa biktima gumikan sa personal nga bangi.

Nasayran gikan kang Canseko nga sa milabay’ng tuig nagkabangi ang anak sa biktima ug ang suspetsado ug tungod kay milaban ang biktima sa iyang anak, nasuko pag-ayo ang suspetsado ug gani ang kareton sa biktima gitagod-tagod niini.

Midugang pagbutyag ang asawa nga sa miaging semana, naghangos ang iyang bana nga miabot sa ilang balay kay matud pa may mipusil kaniya apan wala siya maigo.

Matud pa ni Canseko nga sa kamatayon sa biktima, walay lain silang kapasanginlan gawas sa suspetsado nga daan nang nagdumot kaniya. Sa pagkakaron padayon pang gipangita sa kapolisan  ang suspetsado aron makatubag sa pasangil batok kaniya. (WC)   - (BANAT NEWS)