CAIB molusad og operasyon vs KTV bars

CEBU, Philippines - Giawhag ni Cebu City Anti-Indecency Board (CCAIB) ang mga tag-iya og KTV bar nga mangandam kanunay sa mga birth certificates sa ilang mga empleyado aron dali ra sila maka-presentar kung dunay mga inspeksyon nga buhaton.

Matud pa ni Dr. Lucille Mercado, hepe sa CCAIB nga aduna silay ipahigayong surpresang mga operasyon batok sa mga badlungong mga bars. “Gawas anang dunay minor nga nagtrabaho, gibantayan usab na nato kanang mga bar nga magpasulod usab og minors,” nagkanayon si Mercado.

Kahinumduman nga moabot ngadto sa 146 ka mga babaye ang na-rescue sa mga sakop sa Regional Anti-Trafficking Force, Inter-Agency Council Against Trafficking ug Department of Justice sa usa ka KTV bar niadtong Sabado sa gabii sa barangay Kasambagan, dakbayan sa Sugbo.

Gironda ang Club Jaguar KTV Bar human nakadawat og report ang nahisgutang mga ahensya nga dunay mga minor nga nagtrabaho sa maong establisamento.

Mitambayayong usab sa maong operasyon ang International Justice Mission ug Department of Social Welfare and Development.

Gihimo ang pag-ronda dala ang search warrant nga giisyu ni Judge Ramon Daomilas sa Regional Trial Court Branch 11. Nasayran nga moabot ngadto sa 29 ang mga minor nagtrabaho sa club ug gipaubos kini karon sa counseling nga gidumala sa Crisis Intervention Unit sa DSWD-7.

Kagahapon sa buntag, gipasakaan na og kasong qualified trafficking ang pito ka mga tawong nag-operate sa Jaguar nga naglangkob sa tag-iya, manager, ug uban pang mga empleyado diha sa piskalya    - (BANAT NEWS)